काठमाडौँ । नेपालले चार देशीय महिला टी–२० श्रृंखलाको लिगको अन्तिम खेलमा जित हासिल गरेको छ । फाइनल प्रवेशको होडबाट बाहिरिएको नेपालले श्रृंखलाको तेस्रो खेलमा जापानलाई पराजित गरेको हो ।
हङकङमा जारी प्रतियोगितामा नेपालले दिएको ११४ रनको लक्ष्य पप्याएको जापानले २० ओभरमा अलआउट हुँदै ४६ रनमात्र बनाएपछि नेपाल ६७ रनले विजयी भएको हो ।
जापानका लागि मेग ओगवाले १७ रन बनाइन् । कम रनमा समेट्न नेपाली बलर संगीता राईले ५ विकट लिएकी थिइन् । त्यस्तै पूजा महतो र अस्मिना बज्राचार्यले २–२ विकेट लिए ।
यसअघि पहिले ब्याटिङ गर्दै ब्याटिङ गर्दै नेपालले २० ओभरमा ४ विकेट गुमाउँदै ११३ रन बनाएको थियो । नेपालका लागि रुबिना क्षेत्रीले ३२ बलमा ३८ तथा कप्तान इन्दू बर्माले ३१ बलमा २७ रन जोडिन् । कागज श्रेष्ठले ७ बलमा अविजित रहँदै १५ रन जोडिन् ।
श्रृंखलामा दुई खेलमा हार र एक खेलमा जितसहित नेपाल र तीनै खेलमा हार बेहोरेको जापान फाइनलको दौडबाट बाहिरिइसकेका छन् । नेपाल पहिलो खेलमा तान्जानियासँग २७ रनले हार बेहोरेको थियो भने दोस्रो खेलमा हङकङसँग ९ विकेटले पराजित भएको थियो ।
उपाधिका लागि आइतबार हङकङ र तान्जानिया भिड्ने छन् । तेस्रो स्थानका लागि नेपाल र जापान भिड्ने छन् ।
