काठमाडौँ । भारतमा कोरोना भाइरसको नयाँ भेरियन्ट देखिएको छ । केही महिनादेखि चीनमा देखिएको भनिएको नयाँ भेरियन्ट जेएन वान अब भारतमा पनि देखिएको हो ।
भारतका धेरैजसो राज्यमा यसबाट हुने असरका घटना तीव्र रुपमा बढिरहेका छन् । केरलमा मात्रै कोरोनाबाट ३ जनाको मृत्यु भएको छ ।
यसबाट भारतमा फेरि कोरोना भाइरसको डर फैलिएको छ । स्वास्थ्य विभागले राज्यभर कोरोनालाई लिएर अलर्ट जारी गरेको छ ।
यतिमात्र हैन कर्नाटक र तमिलनाडुमा पनि नयाँ भेरियन्टको संक्रमण तीव्र रुपले फैलिरहेको छ । अस्पतालहरुलाई पनि अलर्टमा राखिएको स्वास्थ्य मन्त्रालयलाई उद्धृत गर्दै भारतीय संचारमाध्यमहरुले लेखेका छन् ।
के हो जेएन वान भेरियन्ट
भारतको रोग नियन्त्रण तथा रोकथाम केन्द्र (सीडीसी) का अनुसार कोरोनाको यो ओमिक्रोन सब भेरियन्ट बीए २.८६ को वंशज हो । यसलाई पिरोला भनिन्छ ।
रिपोर्टअनुसार जेएन वान र बीए २.८६ को बीचमा केबल एउटामात्र परिवर्तन रहेको छ । स्पाइक प्रोटिनमा बदलाव आउनु नै यसको फरक हो ।
नयाँ भेरियन्ट निकै नै तीव्र गतिमा फैलिने क्षमता राख्ने पनि सीडीसीले जनाएको छ ।
यो पहिलो पटक लक्जेम्बर्गमा देखिएको थियो ।
के हो जेएन वानको लक्षण ?
सीडीसीका अनुसार नयाँ भेरियन्टमा खास विशेष लक्षण देखिएका छैनन् । जसका कारण सामान्य ज्वरो र भाइरल हो कि कोरोना भन्ने छुट्टिन गाह्रो हुन्छ ।
तर पनि यो भेरियन्ट जसको प्रतिरोधात्मक क्षमता कमजोर छ, बालबालिका, वृद्धवृद्धा, गर्भवती महिलामा छिटो सर्ने र कमजोर बनाउने देखिएको छ ।
चिकित्सकहरुले कोरोनाको महामारीका बेलामा अपनाइएका सूत्रहरु अहिले पनि अपनाउन सुझाव दिएका छन् ।
चिकित्सकहरुले भिटामिन ए, भिटामिन सी, भिटामिन ई खान जोड गरेका छन् ।
