काठमाडौँ । वीरगञ्जमा सम्पन्न नेपाल प्रो क्लब च्याम्पियनशिप टी–२० क्रिकेटको उपाधि नेपाल पुलिस क्लबले जितेको छ । शनिबार सम्पन्न फाइनल खेलमा पुलिसले पर्सा–११ लाई १०० रनले परजित गर्दै उपाधि जितेको हो ।
पुलिसले दिएको १४६ रनको लक्ष्य पछ्याउने क्रममा पर्सा ११ ओभरमा केवल ४५ रन बनाएर अल आउट भएको थियो। पर्साका लागि अनिल साहलेमात्र दोहोरो स्कोर बनाउने क्रममा १३ रन जोडेका थिए ।
पर्साको ब्याटिङ लाइन ध्वस्त गर्ने क्रममा पुलिसका सागर ढकालले २२ रन खर्चेर ४ विकेट लिए । ललित राजबंशी र रशिद खानले २–२ विकेट लिएका थिए। त्यस्तै करण केसी र शेर मल्लले एक एक विकेट लिएका थिए ।
यसअघि टस जितेर पहिले ब्याटिङ गरेको पुलिसले निर्धारित २० ओभरमा ८ विकेट गुमाउँदै १४५ रन बनाएको थियो । पुलिसका लागि करण केसीले विस्फोटक ब्याटिङ गर्ने क्रममा १७ बलमा ४० रन बनाएका थिए भने अर्जुन साउदले २६, शंकर रानाले १९, दिलिप नाथले १७ र कप्तान आसिफ सेखले १६ रन बनाएका थिए।
यस खेलमा पर्साका नियमित कप्तान सन्दीप लामिछाने खेलेका थिएनन्। बलात्कार आरोपमा दोषी पाइएपछि उनी टिममा समावेश भएका थिएनन् ।
प्रतियोगितामा नेपाल आर्मी क्लब तेस्रो भएको छ । तेस्रो स्थानका लागि भएको भिडन्तमा भारतको वन्डर्स क्लब नोइडालाई ६ विकेटले हराउँदै आर्मी तेस्रो भएको हो ।
पहिले ब्याटिङ गरेको नोइडाले निर्धारित ७ ओभरको खेलमा ३ विकेटको क्षतिमा ७४ रन बनायो । तीन वटै विकेट शहाब आलमले लिए ।
जवाफमा आर्मीले ६.३ ओभरमै ४ विकेटको क्षतिमा जित हासिल गर्यो । सन्दीप रजालीले १० बलमा २३ रन बनाएका थिए । कप्तान विनोद भण्डारी र विवेक यादवले समान ८ बलमा समान १७ रन बनाएका थिए ।
