काठमाडौँ । भारतले अफगानिस्तान विरुद्धको टी–२० क्रिकेट श्रृंखलामा विजयी शुरुआत गरेको छ । श्रृंखलाको पहिलो खेलमा भारतले अफगानिस्तानलाई ६ विकेटले पराजित गरेको हो ।
मोहालीमा अफगानिस्तानले दिएको १५९ रनको लक्ष्य भारतले १७.३ ओभरमा ४ विकेट गुमाउँदै पूरा गरेको थियो ।
भारतको जितमा शिभम दुवेले अविजित रहँदै ४० बलमा ६० रन बनाए । जितेश शर्माले २० बलमा ३१ रन बनाए । त्यस्तै तिलक बर्माले २६, शुभमन गिलले २३ तथा रिंकु सिंहले अविजित १६ रन बनाए । कप्तान रोहित शर्मा भने शून्यमा आउट भएका थिए ।
त्यस्तै अफगानिस्तानका बलर मुजीब उर रहमानले २ विकेट लिए भने अज्मातुल्लाह ओमरजाईले एक विकेट लिएका थिए ।
यसअघि टस हारेर पहिले ब्याटिङ गरेको अफगानिस्तानले २० ओभरमा ५ विकेट गुमाएर १५८ रन बनाएको थियो ।
अफगानिस्तानका लागि मोहमद नाबीले ४२ रन बनाए भने अजमतुल्लाह ओमरजाईले २९, कप्तान इब्राहिम जद्रानले २५, रह्मतुल्लाह गुरबाजले २३ रन बनाएका थिए ।
त्यस्तै भारतीय बलर मुकेश कुमार र अक्सर पटेलले २–२ विकेट लिएका थिए भने शिभम दुवेले एक विकेट लिएका थिए ।
श्रृंखलामा १–० ले अग्रता लिएको छ । दोस्रो खेल आइतबार हुनेछ ।
