काठमाडौँ । अफगानिस्तान विरुद्धको तेस्रो तथा अन्तिम टी–२० क्रिकेटमा भारतले रोमाञ्चक जित हासिल गरेको छ । भारतले बेंगलुरुमा बुधबार राति भएको अविश्मरणीय खेलमा निर्धारित ओभरको खेलमा टाइ भएपछि सुपरओभरमा छिनोफानो भएको हो ।
पहिलो सुपर ओभरमा पनि टाइ भएपछि दोस्रो सुपर ओभरमा खेल भारतले जितेको हो ।
खेलमा पहिले ब्याटिङ गरेको भारतले ४ विकेटको क्षतिमा २१२ रन बनायो । २२ रन जोड्दा ४ विकेट गुमाइसकेको भारतका लागि पाँचौँ विकेटका लागि अहिलेसम्मकै सबैभन्दा बढी अविजित १९० रनको साझेदारी भएसँगै भारतले सम्मानजनक योगफल बनाएको हो ।
सो क्रममा कप्तान रोहित शर्माले शतक र रिंकु सिंहले अर्धशतक बनाए । शर्माले ६९ बलमा १२१ तथा सिंहले ३९ बलमा ६९ रन बनाए । फरिद अहमदले ३ विकेट लिए ।
रोहितले टी–२० मा सबैभन्दा बढी ५ शतक बनाउने कीर्तिमान रचेका छन् । उनले भारतीय सूर्यकुमार यादव र अष्ट्रेलियाका ग्लेन म्याक्सवेलको ४ शतकलाई पछाडि छोडेका हुन् ।
भारतीय खेलाडी रोहित शर्मा र पाकिस्तानका खेलाडी बाबर आजमले ३ शतक बनाएका छन् ।
रोहित सबैभन्दा बढी छक्का हान्ने कप्तान पनि हुन् । उनले ५४ खेलमा १ हजार ६४८ रन बनाउने क्रममा ९० छक्का हानेका छन् ।
जवाफमा अफगानिस्तानले ६ विकेटको क्षतिमा २१२ रन बनायो । गुल्बादिन नइबले २३ बलमा अविजित रहँदै ५५, रहमुल्लाह गुर्बाजले ३२ बलमा ५०, कप्तान इब्राहिम जद्रानले ४१ बलमा ५० तथा मोहम्मद नइबले १६ बलमा ३४ रन बनाए । वासिंगटन सुन्दरले ३ विकेट लिए ।
निर्धारित ओभरको खेलमा टाइ भएपछि खेल सुपर ओभरमा गयो । अफगानिस्तानले पहिले ब्याटिङ गर्दै १ विकेटको क्षतिमा १६ रन बनायो । जवाफमा भारतले पनि कुनै विकेट नगुमाइ १६ रन नै बनायो ।
दोस्रो सुपर ओभरमा भारतले पहिले ब्याटिङ गर्दै २ विकेटको क्षतिमा ११ रन बनायो । जवाफमा अफगानिस्तानले २ विकेट गुमाएर १ रनमात्र बनायो ।
यो रोमाञ्चक जितसँगै भारतले विश्वकप टी–२० अगाडिको श्रृंखला ३–० ले जितेको छ ।
यसअघि पहिलो र दोस्रो खेल भारतले ६ विकेटले जितेको थियो । अफगानिस्तानले अहिलेसम्म भारतलाई टी–२० मा हराएको छैन ।
