काठमाडौँ । भारतमा जारी इन्डियन प्रिमियर लिग आईपीएल टी–२० क्रिकेटमा दिल्ली क्यापिटल्सले प्लेअफ सम्भावना बनाएको छ । शनिबार बेलुकी मुम्बई इन्डियन्समाथि १० रनको रोमाञ्चक जित हासिल गरेसँगै दिल्ली प्लेअफको दाबेदार बनेको हो ।
खेलमा पहिले ब्याटिङ गर्दै दिल्लीले ४ विकेटको क्षतिमा २५७ रन बनायो । ज्याक फ्राजर म्याकगुर्कले २७ बलमा ८४ रन बनाए । त्यस्तै ट्रिस्टन स्टुब्सले २५ बलमा अविजित रहँदै ४८, शाइ होपले १७ बलमा ४१ तथा अभिषेक पोरेलले २७ बलमा ३६ रन जोडे । जवाफमा मुम्बईले ९ विकेटको क्षतिमा २४७ रन बनाउन सक्यो ।
तिलक वर्माले ३२ बलमा ६३, कप्तान हार्दिक पाण्डेयाले २४ बलमा ४६ तथा टिम डेभिडले १७ बलमा ३७ रन जोडे ।
मुकेश कुमार र रसिख सलामले ३–३ विकेट लिए । यो हारसँगै मुम्बईको प्लेअफ पुग्ने सम्भावना असम्भवजस्तै बनेको छ ।
अंक तालिका
८ खेलबाट १४ अंकसहित राजस्थान रोयल्स शीर्ष स्थानमा रहेको छ । कोलकाता नाइट राइडर्स १० खेलबाट १० अंकसहित दोस्रो स्थानमा छ ।
सनराइजर्स हैदराबाद ७ खेलबाट १० अंकसहित तेस्रो स्थानमा छ ।
लखनउ सुपर जाइन्टस ८ खेलबाट १० अंकसहित चौथो स्थानमा छ । दिल्ली क्यापिटल्स १० खेलमा १० अंकसहित पाँचौँ स्थानमा रहेको छ ।
चेन्नई सुपर किंग्स ८ खेलबाट ८ अंकसहित छैटौँ स्थानमा छ ।
गुजरात टाइटान्स ९ खेलबाट ८ अंकसहित सातौँ स्थानमा छ । पञ्जाब किंग्स ९ खेलबाट ६ अंकसहित आठौँ स्थानमा रहेको छ । मुम्बई इन्डियन्स ९ खेलबाट ६ अंकसहित नवौँ स्थानमा छ । पुछारको रोयल च्यालेन्जर्स बैंगलुरूको ९ खेलबाट ४ अंक छ ।
