महिलाको आर्थिक स्तर उकास्ने कार्यक्रम आवश्यक : मन्त्री चौधरी

हाम्रा कुरा

प्रकाशित २०८१ वैशाख ३१ सोमबार

काठमाडौँ । महिला, बालबालिका तथा ज्येष्ठ नागरिक मन्त्री भगवती चौधरीले महिलाको आर्थिकस्तर उकास्ने गरी लक्षित कार्यक्रम सञ्चालन गर्नुपर्ने बताएकी छन् ।

काठमाडौँमा ‘साउथ एशियन वुमन कन्फेरेन्स २०२४ इकोनोमिक एम्पावरसमेन्ट थ्रु डिजिटाइजेशन’ कार्यक्रम सम्बोधन गर्दै उनले राजनीतिक क्षेत्रमा महिलाको सहभागिता बढाउने कुरामा जोड दिएकी हुन् ।

पैतृक सम्पत्तिमा महिला र पुरुषको समान हक हुने संविधानमा लेखिए पनि व्यावहारिक पक्ष कमजोर रहेको उनले बताइन् ।

“महिलामा सम्पत्ति माथिको अधिकार विस्तारै बढ्ने क्रममा छ, तर पर्याप्त भएको छैन”, उनले भनिन्, “तथ्याङ्क हेर्ने हो भने, नौ प्रतिशतबाट विस्तारै बढ्ने क्रममा छ ।”

राष्ट्रिय जनगणनाअनुसार २४ प्रतिशत महिलाको सम्पत्तिमा अधिकार देखिन्छ । अब विस्तारै २६ दशमलव चार प्रतिशत पुग्न लागेको अनुमान रहेको मन्त्री चौधरीले जानकारी दिइन् ।

उनले महिलाको आर्थिक उन्नतिले राज्यमा सकारात्मक प्रभाव पर्ने बताइन् ।