-
-
-
-
काठमाडौँ । उच्च अदालत पाटनले सफाइ दिएपछि नेपाल क्रिकेट सङ्घ (क्यान) ले क्रिकेटर सन्दीप लामिछानेमाथि लगाएको निलम्बन फुकुवा गरेको छ ।
क्यानले क्रिकेटर सन्दीपलाई घरेलु तथा अन्तर्राष्ट्रिय स्तरका सबै प्रकारका क्रिकेट खेल गतिविधिको निलम्बनबाट फुकुवा गरेको हो ।
उच्च अदालत पाटनका न्यायाधीश द्वय सुदर्शनदेव भट्ट र अञ्जु उप्रेतीको इजलासले क्रिकेटर लामिछानेलाई आज सफाइ दिएको थियो ।
यसअघि जिल्ला अदालत काठमाडौँले लामिछानेलाई बलात्कार मुद्दामा दोषी ठहर गर्दै आठ वर्ष कैद र रु पाँच लाखको जरिवाना र क्षतिपूर्तिको फैसला सुनाएको थियो ।
त्यससँगै क्यानले पनि लामिछानेलाई क्रिकेट गतिविधिबाट निलम्बन गरेको थियो ।
योसँगै सन्दीप राष्ट्रिय क्रिकेट टोलीमा फर्कन पाउने भएका छन् । उनले टी २० विश्वकप खेल्न पाउने सम्भावना पनि अझै जीवितै रहेको छ ।
