काठमाडौँ । यतिबेला संघीय सरकार बजेटको अन्तिम चटारोमा रहेको छ । प्रायः कसलाई बजेट दिने र कसलाई बजेट काट्ने भन्ने ध्यानमा सरकार लागिरहेको हुन्छ । 

यही चटारोको बीचमा अपाङ्गता भएकाहरूले आफ्ना माग सम्बोधन गर्न आग्रह गर्दै प्रधानमन्त्री पुष्पकमल दाहाल प्रचण्ड, अर्थमन्त्री वर्षमान पुन र महिला, बालबालिका तथा ज्येष्ठ नागरिक मन्त्री भगवती चौधरीलाई मार्मिक सन्देश पठाएका छन् । 

उनीहरूले तीन जनालाई नै मोबाइलमा उक्त सन्देश पठाएर आफ्ना माग पूरा गर्न सरकार कत्तिको लागिरहेको छ भनेर झक्झक्याएका पनि छन् । 

मंगलबार संसदका दुवै सदनको संयुक्त बैठकमा अर्थमन्त्री पुनले बजेट भाषण गर्दै गर्दा त्यो बजेटमै सम्बोधन हुने गरी आफ्ना माग समेट्न पीडितहरूले माग गरेका हुन् । 

उक्त मार्मिक सन्देशमा आफूहरूसँग गरिएको सहमति कार्यान्वयनतर्फ जाँदै छ कि आफूहरूलाई शहीद बनाउने योजना रचिँदैछ ? भनेर प्रश्नसमेत गरिएको छ । 

उनीहरूलेपठाएको सन्देशमा लेखिएको छ, ‘मन्त्रीज्यू पूर्ण अशक्त अपाङ्गताको लागि ‘व्यक्तिगत सहयोगी सेवा’ उपलब्ध गराउने सम्झौता कार्यान्वयन गर्न बजेटमा ब्यवस्था गर्नु भयो कि शहीद बनाउँदै हुनुहुन्छ ? आन्दोलन, वार्ता र अनशन जारी छ । हामीलाई थप आन्दोलनमा नधकेल्नु होला । बजेटको प्रतीक्षामा छौँ । दीपक भण्डारी बचाऔँ !’

यसअघि अपाङ्गता भएका व्यक्तिहरूले आफूहरूसँग सरकारले गरेको सहमतिको कार्यान्वयन गर्न दबाब दिन राजधानीमा गरिएको प्रदर्शनमा प्रहरीले हस्तक्षेप गर्दा केही अपाङ्गता भएकाहरू घाइतेसमेत भएका थिए । 

पूर्ण अशक्त अपाङ्गता भएका दीपक भण्डारीको जीवन रक्षासँगै अपाङ्गता भएकाहरूसँगको सहमति पालना गर्न सरकारलाई दबाब दिन आयोजित प्रदर्शनमा दमन भएको हो । यसको चौतर्फी आलोचना भएको थियो । 

उक्त दमनप्रति अपाङ्गता भएकाहरूले आक्रोश पोख्दै सहकारी ठगी प्रकरणमा मुछिएका गृहमन्त्री रवि लामिछानेको राजीनामासमेत मागिएको थियो । 

तनहुँका दीपक भण्डारी शान्ति बाटिकामा निरन्तर अनसनरत छन् । गत चैत १४ मा महिला, बालबालिका तथा ज्येष्ठ नागरिक मन्त्रालय र भण्डारीबीच माग सम्बोधनको सहमति भएको थियो । सहमतिअनुसार सामुदायिक सहायता तथा व्यक्तिगत सहयोगी सेवा यही बैशाख १ देखि शुरु गर्ने भनिएको थियो । 

यसका लागि तीन सदस्यीय समिति गठन गरेर आवश्यक कार्यक्रम र मापदण्डको मस्यौदा प्रतिवेदन बनाइयो । तर प्रतिवेदन लागू नभएको भन्दै भण्डारीले गत बैशाख १८ देखि अनसन थालेका हुन् । 

राष्ट्रिय लोकतान्त्रिक अपांग संघका निवर्तमान अध्यक्ष भोजराज श्रेष्ठका अनुसार यसअघि सरकारले गरेको सहमति अनुसार माग सम्बोधन नभए थप आन्दोलन चर्काउने चेतावनी दिएका छन् । 

उनले बजेटमै आफूहरूका मागको सम्बोधन हुनुपर्नेसमेत बताएका छन् । भण्डारी लामो समयदेखि अनसनरत भए पनि सरकारले बेवास्ता गरेको भन्दै सरकारको नियतमाथि प्रश्नचिन्ह खडा भएको छ । 

वार्ता जारी रहे पनि माग पूरा गराउनतिर भने सरकार अग्रसर भएको देखिएको छैन । त्यसैले उनीहरूले मार्मिक सन्देश लेखेर प्रधानमन्त्री, अर्थमन्त्री र बालबालिका मन्त्रीलाई पठाएका हुन् ।