जम्मु–काश्मीरमा आतंकवादी हमला, पाँच सैनिकको मृत्यु
हाम्रा कुरा
प्रकाशित २०८१ असार २५ मंगलबार
798
Shares
काठमाडौँ । भारतको जम्मु काश्मीरको कठुआमा भएको आतंकवादी हमलामा एक जुनियर कमिसन्ड अफिसर (जेसीओ) सहित पाँच सैनिकको मृत्यु भएको छ ।
आक्रमणमा परी घाइते भएका पाँच सैनिकलाई मिलिटरी अस्पतालमा पुर्याइएको भारतीय मिडियाहरुले उल्लेख गरेका छन् ।
सुरक्षा बल लोहाई मल्हार ब्लकको मछेदी क्षेत्रको बडनोटामा खोजी गरिरहेको बेला आतङ्ककारीले हमला गरेको बताइएको छ ।
अत्याधुनिक हतियारले सुसज्जित आतंकवादीले सुरक्षा बलमाथि गोली चलाउन थालेपछि दोहोरो भिडन्त भएको थियो ।
काश्मीर टाइगर्स नामक आतंकवादी संगठनले सेनामाथि हमलाको जिम्मेवारी लिएको छ । यो संगठन प्रतिबन्धित पाकिस्तानी आतंकवादी संगठन जैश(ए(मोहम्मदको शाखा मानिन्छ ।
भारतीय सेनाले यस वर्षको अन्त्यसम्म जम्मु क्षेत्रबाट आतंकवादलाई समाप्त गर्ने योजना बनाएको छ। गृह मन्त्रालयमा हालै भएको बैठकपछि पुँछ, राजौरी, रियासी, कठुआमा सक्रिय ३० आतङ्ककारीको सूची बनाइएको छ । आतङ्ककारी र उनीहरूका सहयोगीहरूलाई निर्मूल पार्न शत्रु एजेन्ट ऐनलाई मूल स्वरूपमा लागू गर्ने निर्णय भएको छ ।
