पोखरा । नबिल बैंकको ४०औं वार्षिकोत्सवको सन्दर्भमा देशभर विभिन्न कार्यक्रम भइरहेका छन् ।
यसैक्रममा बैंकको गण्डकी प्रदेश कार्यालयको आयोजनामा ‘नबिल दिगो पाइला’ वाकाथन कार्यक्रम सम्पन्न भएको छ । दिगो भविष्यको प्रतिवद्धतासहित जनचेतना जगाउने उद्देश्यले वाकाथन कार्यक्रम आयोजना गरिएको बैंकले जनाएको छ ।
बैंकले दिगो भविष्य निर्माणको प्रतिबद्धता जनाउँदै शनिबार बिहान पोखरामा कार्यक्रम गरेको हो ।
कार्यक्रम उद्घाटन गर्दै बैंकका गण्डकी प्रदेश प्रमुख हरि ढकालले बैंकले हालसम्म प्राप्त गरेका उपलब्धिलाई संस्थागत गर्दै दिगो भविष्यप्रति प्रतिवद्धताका लागि वाकाथनमार्फत ऐक्यबद्धता जनाइएको बताए ।
शनिबार बिहान नबिल बैंक लेकसाइड शाखाबाट सुरु भएको वाकाथन बाराही मन्दिर गेट, फेवा फुट ट्रयाक हुँदै विभिन्न ठाउँ परिक्रमा गरी नबिल बैंक लेकसाइड शाखामै पुगेर समापन भएको हो ।
कार्यक्रममा पोखरास्थित बैंकका कर्मचारी सहभागी थिए । पोखरासहित प्रधान कार्यालय काठमाडौँलगायत देशभर बैंकले सो कार्यक्रम आयोजना गरेको थियो ।
बैंकले देशभर २४ लाखभन्दा बढी सेवाग्राहीलाई दुई सय ६८ शाखा र तीन सय १६ एटीएममार्फत सेवा प्रदान गर्दै आएको छ ।
