संविधान दिवसको उपहार, नागरिकलाई निःशुल्क धरहरा प्रवेश [फोटोफिचर]

हाम्रा कुरा

प्रकाशित २०८१ असोज ३ बिहिबार

काठमाडौँ । मुलुकले आज संविधान दिवस मनाइरहँदा राजधानीमा उपलब्ध नागरिकले उपहार पाएका छन् । नागरिकले २०७२ सालको गोरखा भूकम्पले ढलाएको धरहरा पुननिर्माणकै क्रममा रहेका बेलामा निःशुल्क धरहरा चढ्ने उपहार पाएका हुन् ।

दैनिक पाँच सय जनलाई निःशुल्क धरहरामा जान दिइने पनि बताइएको छ । उपप्रधान तथा सहरी विकास मन्त्री प्रकाशमान सिंहले धरहरा आंशिक रुपमा मात्र सञ्चालन गर्न लागिएको बताएका छन् ।

हाल अनलाइन मार्फत बुक गर्ने ५०० जनाले मात्र दैनिक धरहरा चढ्न पाउने उपप्रधानमन्त्री सिंहले बताए । प्रधानमन्त्री केपी शर्मा ओलीले २०७८ बैशाख ११ गते उद्घाटन गरेको धरहरा साढे तीन वर्षपछि बल्ल सर्वसाधारणका लागि खुला गरिएको हो ।

यो खुला पनि नियमित भने अझै हुने छैन । यसलाई कुनै पनि बेला फेरि बन्द गरिन सक्छ । ६ पटकसम्म म्याद थप गरिएको धरहरा बिहीबार फेरि उद्घाटन भएको हो ।

भूकम्पको एक दशकसम्म पनि पुनःनिर्माण सम्पन्न हुन नसकेको धरहरा फेरि पनि हतारमै उद्घाटन भएको हो । २०७२ को बैशाख १२ गते गोरखा भूकम्पमा परी भत्किएको धरहराको भग्नावशेष सिसामा राख्ने भनिएको भए पनि अझै पनि धरहराको अवशेष टिनको छाना हालेर राखिएको छ ।

यो आयोजना पुनःनिर्माण प्राधिकरणको समय सीमा भित्र निर्माण हुन नसकेपछि सहरी विकास मन्त्रालय मातहत सहरी विकास तथा भवन निर्माण विभागबाट आयोजना कार्यान्वयन भइरहेको छ ।