राष्ट्रिय झण्डाले दरबार मार्ग ढपक्क, ओलीको अगाडि बालेनको पक्षमा नारा [फोटोफिचर]

हाम्रा कुरा

प्रकाशित २०८१ असोज ३ बिहिबार

काठमाडौँ । सरकारले संविधान दिवस भव्यपूर्वक मनाएको छ । सो क्रममा दरबार मार्गमा नेशनल डे कन्सर्ट आयोजना गरियो । दरबार मार्ग राष्ट्रिय झण्डाले ढपक्क ढाकिएको थियो ।

नेशनल डे कन्सर्ट आयोजना भइरहेको दरबार मार्ग क्षेत्रमा नेपालको झण्डा फहराइएको हो । संविधान दिवसको अवसर पारेर आयोजना भएको नेशनल डे कन्सर्टका लागि हजारौँ मानिस दरबार मार्ग क्षेत्रमा पुगे ।

मानिसहरूको आवागमन हेरेर करिब पाँच हजार सुरक्षाकर्मीसमेत परिचालन गरिएको थियो ।

केपी ओली दरबार मार्गमा, बालेनको पक्षमा हुटिङ
प्रधानमन्त्री केपी शर्मा ओली पनि पत्नी राधिका शाक्यका साथ उक्त कन्सर्ट हेर्न दरबारमार्ग पुगे । बिहीबार साँझ कन्सर्ट अवलोकनका लागि पुगेका उनले पनि मनोरञ्जन लिएका थिए ।

सो अवसरमा अर्थमन्त्री विष्णुप्रसाद पौडेल र गृहमन्त्री रमेश लेखक पनि सहभागी थिए ।

ओलीले स्टेजमा पुगेर संविधान दिवसको शुभकामना दिएका थिए । तर उनी पुगेका बेला काठमाडौँ महानगरपालिकाका मेयर वालेन्द्र साह बालेनको पक्षमा हुटिङ भएको थियो ।

बालेनका समर्थकहरूले बालेन, बालेन भनेर हुटिङ गरेका हुन् । पछिल्लो समय विभिन्न जात्रा तथा विशेष समारोहमा बालेनका समर्थकहरूले राष्ट्रपति, प्रधानमन्त्रीसहित शीर्ष दलका नेताहरू पुगेका बेला बालेनको पक्षमा हुटिङ गर्दै आएका छन् ।