पोखरा । राष्ट्रिय स्वतन्त्र पार्टी (रास्वपा)ले सभापति रवि लामिछाने पक्राउको विरोधमा ७७ वटै जिल्लाबाट सरकारलाई ज्ञापनपत्र बझाउने भएको छ ।
प्रमुख जिल्ला अधिकारीमार्फत सरकारलाई ज्ञापनपत्र बुझाउन लागिएको पार्टीका सहमहामन्त्री कवीन्द्रप्रसाद बुर्लाकोटीले जानकारी दिए ।
रास्वपाले सभापति लामिछानेलाई सरकारले राजनीतिक प्रतिशोधका आधारमा पक्राउ गरिएको आरोप लगाउँदै । पार्टीले निरन्तर आन्दोलन जारी राख्ने जनाएको छ ।
सभापति लामिछानेलाई पक्राउ गरी पोखरा ल्याइएसँगै देशभरका नेता तथा कार्यकर्ता पोखरा आएका छन् । उनीहरुको व्यवस्थापन पार्टीको जिल्ला र गण्डकी प्रदेश समितिले गरिरहेको छ । पार्टीका करिब पाँच सय कार्यकर्ता कास्की बाहिरबाट पोखरा आएको दावी गरिएको छ ।
विभिन्न जिल्लाबाट नेता तथा कार्यकर्ता, शुभेच्छुक पोखरा आउनेक्रम जारी रहेको नेता बुर्लाकोटीले बताए । पार्टीको निर्देशनमा नभई स्वतःस्फूर्त रूपमा कार्यकर्ता पोखरा आएको उनको दावी छ ।
रास्वपाले पटकपटक न्यायिक प्रक्रियामा सघाउन तयार रहेको जनाए पनि दवावमूलक कार्यक्रम निरन्तर गरिरहेको छ ।
शनिबार चिप्लेढुंगामा शक्ति प्रदर्शन गरेको रास्वपाले आज शहीदचोकमा निषेधाज्ञा नै तोडेर प्रदर्शन गरिरहेको छ । उनीहरुले सरकारबिरुद्ध चर्का नारा घन्काएका छन् ।
लामिछानेलाई म्याद थपका लागि आज अदालतमा पेस गरिएको र प्रक्रिया हेरेर पार्टीले थप कार्यक्रम ल्याउँने बुर्लाकोटीले बताए ।
भ्रष्टाचारीहरूको सरकार अन्त्य नभएसम्म आन्दोलन जारी रहने उनले उद्घोष गरे । एमाले नेता ऋषिकेश पोखरेल र कांग्रेसका उपसभापति धनराज गुरुङलाई छानबिनको दायरामा नल्याएकोप्रति पनि उनले आपत्ति जनाए ।
