रविको बयान जारी, अनुसन्धान प्रभावित गर्न रास्वपाको पोखरा केन्द्रित प्रदर्शन कायमै
स्थानीयको साथ नपाएपछि नेताहरू घरघरमा पुगेर बोलाए सरकारविरुद्धको प्रदर्शनमा सहभागी हुन
हाम्रा कुरा
प्रकाशित २०८१ कार्तिक ७ बुधबार
282
Shares
पोखरा । राष्ट्रिय स्वतन्त्र पार्टी रास्वपाको पोखरा केन्द्रित सडक आन्दोलन जारी रहेको छ । बुधबार पोखराको सृजनाचोकमा विरोध प्रदर्शन गर्दैछ । पार्टी सभापति एवं पूर्व गृहमन्त्री रवि लामिछानेलाई सहकारी गठी प्रकरणमा पक्राउ गरेर ल्याइएसँगै रास्वपाले पोखरामा विरोध प्रदर्शन गरिरहेको हो ।
लामिछानेलाई गत शुक्रबार साँझ काठमाडौँबाट पक्राउ गरी शनिबार बिहान पोखरा ल्याइको थियो । उनलाई आइतबार अदालत उपस्थित गराएर ६ दिनको म्याद थप भइ मंगलबारदेखि सरकारी वकीलसमक्ष बयान चलिरहेको छ ।
रास्वपाले शनिबारदेखि विरोध प्रदर्शन गरिरहेको हो । शनिबार चिप्लेढुंगामा शक्ति प्रदर्शन गरेको रास्वपाले आइतबार शहीदचोक, सोमबार पृथ्वीचोकबाट महेन्द्रपुल र मंगलबार जिरोकिमीदेखि अमरसिंहचोकसम्म विरोध प्रदर्शन गरेको थियो ।
रास्वपाको यस प्रदर्शनमा देशभरबाट एक हजार भन्दा बढी नेता कार्यकर्ता पोखरा आएका बताइएको छ ।
यसैबीच रास्वपाको आन्दोलनमा पोखरावासीको साथ नपाएपछि रास्वपाका नेताहरुले घरदैलो गर्दै स्थानीयलाई सरकार विरुद्धको प्रदर्शनमा सहभागी हुन आग्रह गरेका छन् ।
उपसभापति डा स्वर्णिम वाग्ले, सांसद विराजभक्त श्रेष्ठ, डा तोसिमा कार्की, सविता गौतम, मनिष झा, रमेश प्रसाईँलगायतका नेताहरुले स्थानीयको घर–घरमा पुगेर आन्दोलनमा सहभागी हुन आग्रह गरेका छन् ।
