वर्षाका कारण नेपाल र स्कटल्यान्डबीचको खेल रद्द

हाम्रा कुरा

प्रकाशित २०८१ कार्तिक २० मंगलबार

काठमाडौँ ।आईसीसी पुरुष विश्वकप क्रिकेट लिग–२ को त्रिकोणात्मक शृङ्खलाअन्तर्गत स्कटल्यान्ड र नेपालबीचको खेल वर्षाका कारण रद्द भएको छ । अमेरिकाको डालसस्थित ग्राउण्ड प्रेरी क्रिकेट रङ्गशालामा वर्षासँगै हावाहुरीको सम्भावना भएपछि खेल रद्द भएको हो ।

स्कटल्यान्ड र नेपालबीचको खेल छ ओभरसमै रोकियो । यसअघि वर्षाका कारण १ ओभरमा खेल रोकिएको थियो । पहिला ब्याटिङ गरेको नेपालले छ ओभरको खेलमा १ विकेट गुमाउँदै २६ रन बनाएपछि वर्षाका कारण खेल रोकियो।

नेपालले आफूले खेलेका १२ खेलमध्ये २ वटामा मात्र जित हासिल गरेको छ । यस्तै ८ खेलमा हार र २ खेल रद्द हुँदा नेपाल ६ अङ्कका साथ सातौँ स्थानमा छ ।