ह्यारिसको हारपछिको पहिलो सम्बोधनमा समर्थक भावविह्वल, थामिएनन् आँशु

हाम्रा कुरा

प्रकाशित २०८१ कार्तिक २२ बिहिबार

काठमाडौँ । अमेरिकी राष्ट्रपति चुनावमा पराजयपछि ह्वाइट हाउस पुग्ने सपना अधुरै छाडेकी डेमोक्र्याट उम्मेदवार कमलादेवी ह्यारिसले आफ्ना समर्थकलाई सम्बोधन गरेकी छिन् ।

हारपछिको पहिलो सम्बोधनमा ह्यारिसले आफ्ना समर्थकहरूलाई डोनाल्ड ट्रम्पको जीत स्वीकार गर्न अपील गरेकी छिन् । यससँगै उनले आफ्ना समर्थकहरूलाई आफ्नो आदर्शका लागि ‘कहिल्यै हार नमान्न’ भनेकी छिन् ।

वाशिंगटन, डीसीको हावर्ड विश्वविद्यालयमा एक भाषणमा, ह्यारिसले हार स्वीकार गर्दै भनिन्, ‘चुनावको नतिजा हामीले चाहेको अनुसार भएन ।’
ह्यारिसले शान्तिपूर्ण रूपमा सत्ता हस्तान्तरण हुनुपर्ने बताएकी छन् ।

आफ्ना समर्थकहरूलाई निराश नहुन भन्दै ह्यारिसले आफ्ना उपराष्ट्रपतिका उम्मेदवार गभर्नर टिम वाल्ज, अभियान कर्मचारी, समर्थक, मतदान कार्यकर्ता र निर्वाचन अधिकारीहरूलाई धन्यवाद दिएकी थिइन् ।

उनको सम्बोधनका क्रममा उनका समर्थक भावविह्वल बनेका थिए भने धेरैले आँसु पुछेको देखिएको थियो ।

ह्यारिसले आफ्नो सम्बोधनमा भनिन्, ‘मलाई थाहा छ मानिसहरू अझै पनि धेरै भावनाहरूबाट गुज्रिरहेका छन् । म बुझ्छु, तर हामीले यो चुनावको नतिजालाई सम्मान गर्नुपर्छ ।’

ह्यारिसले चुनावमा पराजय भोग्नु परे पनि आफूले उठाएका मुद्दामा संघर्ष जारी राख्ने बताइन् ।