काठमाडौँ । मेडिकल व्यवसायी दुर्गा प्रसाईं पक्राउ परेका छन् । प्रसाईलाई मंगलबार नेपाल प्रहरीको केन्द्रीय अनुसन्धान ब्युरो सीआईबीको टोलीले भक्तपुरस्थित उनकै निवासबाट पक्राउ गरेको हो ।
सामाजिक सञ्जालबाट अफवाह फैलाएको अभियोगमा प्रसाईलाई पक्राउ गरिएको हो । साइबर अपराध सम्बन्धी कसूर गरेको अभियोगमा निजलाई नियन्त्रणमा लिइएको सीआईबीले जनाएको छ ।
प्रसाईलाई हिरासतमा लिएर अनुसन्धान गर्न आजै अदालतसमक्ष उपस्थित गराइँदै छ ।
प्रसाईले प्रधानमन्त्री केपी शर्मा ओलीले कम्बोडियाको टेलिकम कम्पनीमा लगानी गरेको प्रमाण भन्दै कागजपत्र सार्वजनिक गरेपछि प्रहरीले उनलाई पक्राउ गरेको हो ।
प्रसाईले मंगलबार बिहान आफूले कम्बोडियामा ओलीको लगानी रहेको विषय पत्रकार सम्मेलन मार्फत सार्वजनिक गरेपछि आफूलाई फेरि झूटो मुद्धा लगाई पक्राउको तयारी गरेको बताएका थिए ।
प्रहरीका अनुसार प्रसाईंविरुद्ध साइबर अपराधमा अनुसन्धान भइरहेको छ । साथै उनी कीर्ते र संगठित अपराधमा पनि तानिने सम्भावना उत्तिकै छ ।
