रास्वपाले माग्यो गृहमन्त्रीको राजीनामा र उच्चस्तरीय छानबिन आयोग गठन [भिडियो]
गृहमन्त्री रमेश लेखकले राजीनामा दिएर छानबिन शुरु नभएसम्म संसद चल्न नदिने रास्वपाको चेतावनी
हाम्रा कुरा
प्रकाशित २०८२ जेठ १३ मंगलबार
700
Shares
काठमाडौँ । राष्ट्रिय स्वतन्त्र पार्टी (रास्वपा) ले मानव तस्करी र भिजिट भिसा प्रकरणबारे छानबिन गर्न उच्चस्तरीय छानबिन आयोग गठन गर्न माग गरेको छ।
प्रतिनिधि सभाको मङ्गलबारको बैठकमा बोल्दै रास्वपा सांसद शिशिर खनालले भिजिट भिसा प्रकरणमा गृहमन्त्रीसहितका कर्मचारीमाथि सङ्गठित अपराध र सम्पत्ति शुद्धीकरणमा अनुसन्धान गर्न उच्चस्तरीय छानबिन आयोग गठन गर्न माग गरेका हुन्। उनले भिजिट भिसा प्रकरणमा म्यानपावरदेखि एयरलाइन्ससम्म र कर्मचारीदेखि गृहमन्त्रीको सचिवालयसमेत जोडिएको उल्लेख गरे। खनालले गृहमन्त्री रमेश लेखकले राजीनामा दिएर छानबिन सुरु नभएसम्म संसद चल्न नदिने चेतावनी दिए।
"यो कुनै एक कर्मचारीले नागरिकता बनाउन गएको बेला नागरिकसँग घुस मागेको विषय होइन," खनालले भने, "यो त म्यानपावरदेखि एयरलाइन्ससम्म, कर्मचारीदेखि मन्त्रीज्यूसम्मको सचिवालय जोडिएको छ। प्रश्न मन्त्रीज्यूमाथि उठेको छ। अनुसन्धान हुनुपर्छ। राजीनामा आउनुपर्छ।" उनले थपे, "तर हामी राजीनामा मात्रै माग्दै छैनौँ। सङ्गठित ढङ्गले गरिएको यो भ्रष्टाचारको निष्पक्ष अनुसन्धान हुनुपर्छ। सङ्गठित अपराध र सम्पत्ति शुद्धीकरणसँग जोडिएर छानबिन गर्न एक उच्चस्तरीय छानबिन आयोग नबनेसम्म संसद चल्न सक्दैन।"
गृहमन्त्रीको राजीनामा माग गर्दै प्रतिपक्षी दलहरूले नाराबाजी गरेपछि मङ्गलबारको बैठक आधा घण्टाका लागि स्थगित भएको छ।
