बेइजिङ । चीन र जापानले शुक्रबार आणविक फोहोर पानीको टोकियोको व्यवस्थापनलाई लिएर वर्षौंदेखिको विवाद अन्त्य गर्न नजिक पुगेको बताएका छन्। यस विवादका कारण बेइजिङले जापानी समुद्री खानाको आयातमा प्रतिबन्ध लगाएको थियो।

सन् २०२३ मा जापानले बिस्तारै फुकुसिमा आणविक संयन्त्रबाट प्रशोधन गरिएको फोहोर पानी प्रशान्त महासागरमा छोड्न थालेको थियो। यो कदमलाई अन्तर्राष्ट्रिय आणविक ऊर्जा एजेन्सीले समर्थन गरे पनि बेइजिङले कडा आलोचना गरेको थियो र त्यसपछि जापानी समुद्री खाना आयातमा प्रतिबन्ध लगाएको थियो।

चीनले जापानसँगको सम्बन्ध टोकियोको साम्राज्यवादी विरासतले गर्दा लामो समयदेखि तनावपूर्ण रहेको बताएको छ। उसले प्रशोधित फोहोर पानीलाई वातावरणीय रूपमा गैरजिम्मेवार भन्दै निकासीको कडा विरोध गरेको थियो। फुकुसिमा आणविक सुविधा सन् २०११ मा एउटा ठूलो भूकम्पले निम्त्याएको घातक सुनामीका कारण डुबेको थियो, जसले यसका छ वटा रिएक्टरमध्ये तीन वटालाई पग्लन बाध्य तुल्याएको थियो।

यस हप्ता बेइजिङमा जापानी अधिकारीहरूसँग भएको वार्ताले ‘पर्याप्त प्रगति हासिल गरेको’ भन्दै चीनले शुक्रबार प्रतिबन्ध हटाउने नजिक पुगेको सङ्केत गरेको छ। बेइजिङको भन्सार प्रशासनले एक विज्ञप्तिमा भनेको छ, "यस वर्ष अहिलेसम्म दुई पक्षले धेरै चरणका प्राविधिक आदानप्रदान गरेका छन्," यद्यपि थप विवरण दिइएको छैन।

जापानका मुख्य क्याबिनेट सचिव योशिमासा हयासीले बेइजिङ र टोकियोले ‘चीनमा मत्स्य उत्पादनहरूको निर्यात पुनः सुरु गर्न आवश्यक प्राविधिक आवश्यकताहरूबारे सहमतिमा पुगेको’ बताएका छन्। "निर्यातसम्बन्धी सुविधाहरूका लागि पुनः दर्ता प्रक्रिया सम्पन्न भएपछि चीनमा निर्यात पुनः सुरु हुनेछ," हयासीले शुक्रबार भने, "हामी यसलाई एउटा प्रमुख कोसेढुङ्गाका रूपमा लिन्छौँ।"

यसअघि चीनले फेब्रुअरीमा फुकुसिमा प्लान्ट नजिकै स्वतन्त्र रूपमा सङ्कलन गरेको समुद्री पानी र समुद्री जीवको नमूनामा कुनै असामान्यता नभेटिएको तर प्रतिबन्ध खारेज गर्नुअघि थप परीक्षण आवश्यक रहेको सङ्केत गरेको थियो।