कांग्रेसको केन्द्रीय समिति बैठक बस्दै: गठबन्धन सरकारको समीक्षा र सांगठनिक सुदृढीकरण मुख्य एजेण्डा
हाम्रा कुरा
प्रकाशित २०८२ असार १६ सोमबार
2.9k
Shares
काठमाडौँ। सत्तारुढ दल नेपाली कांग्रेसको केन्द्रीय कार्यसमितिको बैठक आजदेखि बस्दैछ। पार्टीको आगामी रणनीति र संगठन सुदृढीकरणका महत्त्वपूर्ण विषयमा छलफल गर्नका लागि यो बैठक बोलाइएको हो। हिजो पार्टी सभापति एवं पूर्वप्रधानमन्त्री शेरबहादुर देउवाको निवास बूढानीलकण्ठमा बसेको पदाधिकारी तथा पूर्वपदाधिकारी बैठकले आज बस्ने केन्द्रीय कार्यसमितिको बैठकका एजेण्डा तय गरेको छ।
पार्टीका प्रवक्ता डा. प्रकाशशरण महतका अनुसार, केन्द्रीय समिति बैठकमा विभिन्न महत्त्वपूर्ण विषयमा छलफल हुनेछ। मुख्यतया, गठबन्धन सरकारको कार्यप्रगति को समीक्षा गरिनेछ, जसमा संघीय र प्रदेश सरकारमा सहभागी कांग्रेसका मन्त्रीहरूले आ-आफ्नो क्षेत्रको काम कारबाहीबारे जानकारी गराउनेछन्। गठबन्धन सरकारको प्रभावकारिता र भावी रणनीतिबारे पनि गहन छलफल हुनेछ।
बैठकले भ्रातृ संस्थाहरूको व्यवस्थापन लाई प्राथमिकता दिनेछ। तोकिएको समयमा महाधिवेशन गर्न नसकेका भ्रातृ संस्थाहरूको तदर्थ समितिको म्याद थप गर्ने वा नगर्ने विषयमा निर्णय लिइनेछ। यसका साथै, पार्टीको सक्रिय सदस्यता वितरण र नवीकरणको प्रगतिबारे पनि महामन्त्रीले बैठकमा जानकारी गराउने कार्यक्रम छ।
प्रवक्ता डा. महतले आजदेखि सुरु हुने बैठकले नेपाली कांग्रेसको आगामी रणनीति र संगठन सुदृढीकरणमा महत्त्वपूर्ण भूमिका खेल्ने विश्वास व्यक्त गरे। उनले गठबन्धन सरकारको कार्यप्रगति र भ्रातृ संस्थाहरूको प्रभावकारी व्यवस्थापनले पार्टीको आन्तरिक एकता र बाह्य प्रभावकारितालाई थप मजबुत बनाउने अपेक्षा कांग्रेसले लिएको बताए।
