[टिप्पणी] महानगरको कार्यदल : अनियमितता रोक्न कि भ्रष्टाचारीलाई उम्काउने खेल ?

ब्यूराे, प्रकाशित मिति : २०७३ माघ २५ मंगलबार
तस्वीर : हाम्राकुरा
काठमाडौं । गत माघ १९ गते काठमाडौंको त्रिपुरेश्वरमा रहेको एक व्यापारिक भवनमा काठमाडौं महानगरपालिकाका कर्मचारीहरुले मनोमानी रुपमा ८ तलाको भवनलाई ५ तलाको बनाएको भनेर समाचार आयो । सो समाचारमा निर्माण सम्पन्न भएको भनेर महानगरले दिएको निर्माण सम्पन्न प्रमाणपत्रमा उल्लेख गरिएको भन्दा ३ तला बढी भवन निर्माण गरिएको तस्वीर समेत समेटिएको छ । 
 
यसरी समाचार सार्वजनिक भएपछि काठमाडौं महानगरपालिकाले यो र यस्ता घटनाको विषयमा छानविन गर्नको लागि भनेर महानगरकै नक्सा शाखाका भवन निर्माण इजाजत महाशाखा प्रमुख राम थापाको नेतृत्वमा छानविन कार्यदल गठन पनि गर्‍यो । महानगरको बोर्ड बैठकले महानगरपालिका क्षेत्रका भवनहरु निर्माण गर्दा इजाजत पाए अनुरुप भए नभएको अनुगमन गर्ने तथा अनियमितलाई नियन्त्रण गर्ने दायित्व सहित कार्यदल गठन गरेको हो । कार्यदलमा भवन इजाजत विभागबाट १ जना सदस्य सचिव, ४ जना इञ्जिनियर र १ जना नगर प्रहरी निरीक्षक बताईएको छ ।
 
तर, यो कार्यदल गठन भएपछि महानगरबासीहरुमा महानगरको भ्रष्टाचार रोकिने र अतिरिक्त पैसा विना कुनैपनि कार्य सम्पादन नहुने नक्साशाखामा सुधार आउने विश्वास हुनुपर्ने हो । तर, महानगरको सो कार्यदलप्रति विश्वास गर्नेहरुको संख्या भन्दा धेरैले यसप्रति शंकाभावले हेर्ने गरेका छन् । किन त ?
 
अहिले नक्साशाखामा रहेका अधिकारीहरु लामो समयदेखि एउटै शाखामा बस्ने र सरुवा गरेर अन्त लैजान खोजिएपनि फेरि सेटिङ मिलाएर सोही शाखामा फिर्ता हुने परिपाटीको विकास भएको आरोप पनि लाग्ने गरेको छ । 
 
त्यसैले पुराना र सेवाग्राहीहरुसँग अतिरिक्त रकम असुल्न माहिर कर्मचारीहरुका कारण सो शाखामा अतिरिक्त पैसा नतिरी कुनैपनि काम गर्न सम्भव नभएको गुनासो सेवाग्राहीहरुले गर्ने गरेका छन् । तर, महानगरपालिकाले अनियमितता रोक्नको लागि भनेर तयार पारेको कार्यदलको संयोजक नै सोही विभागका जिम्मेवार व्यक्तिलाई राख्नुको औचित्य के भन्ने प्रश्न पनि उठेको छ । 
 
आफैंले गरेको काममा गल्ती भयो भन्ने अधिकार त कार्यदलका संयोजकसँग रहँदैन । उता, विभागमा बसेर काम गरुन्ज्यालसम्म अनियमितता रोक्न नसकेका व्यक्तिले कार्यदल गठन गरेपछि चाहिँ चामत्कारिक रुपमा काम काम गर्न सक्छन् भन्न सकिने पनि आधार छैन । कार्यदलमा बसेपनि उनले जसरी पनि अनियमितता सार्वजनिक गर्नेछैनन् किनभने यस्ता अनियमितताहरु सार्वजनिक गरेको खण्डमा उनकै कार्य क्षमतामाथि प्रश्न उठ्ने पक्कापक्की रहेको छ । 
 
त्यसैले काठमाडौं महानगरपालिकाले गठनगरेको कार्यदलले निकास दिनेमा जानकारहरुलाई विश्वास छैन । तर, अविश्वासका बावजूत पनि कार्यदलले निस्पक्ष रुपमा यसको छानविन गर्न सकेको खण्डमा भने यो काम पनि उदाहरणीय बन्नेकुरा भने कार्यदलका सदस्यहरुले पनि मनन गर्न सक्ने विषय हो । 
 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ