काठमाडौँ। दक्षिण कोरियाली प्राविधिक समूह सामसुङले आर्टिफिसियल इन्टेलिजेन्स (एआई) को विश्वव्यापी मागलाई मध्यनजर गर्दै आगामी पाँच वर्षमा ३१० अर्ब डलर लगानी गर्ने महत्वाकांक्षी योजना आइतबार सार्वजनिक गरेको छ।
विश्वको शीर्ष मेमोरी–चिप निर्मातामध्ये एक सामसुङ इलेक्ट्रोनिक्सले एआई उद्योगका लागि अत्यावश्यक चिप्स आपूर्ति गर्दै आएको छ। यो नयाँ लगानी प्याकेजमा 'मेमोरी चिप्सको मागहरू पूरा गर्न' डिजाइन गरिएको नयाँ सेमिकन्डक्टर सुविधा (प्योङटेक प्लान्ट ५) निर्माण गर्ने योजना समावेश छ। सामसुङले २०२८ मा सञ्चालन सुरु गर्ने लक्ष्य राखेको यो प्लान्टले विश्वव्यापी सेमिकन्डक्टर आपूर्ति श्रृंखला र दक्षिण कोरियाको घरेलु चिप्स प्रणाली दुवैमा महत्त्वपूर्ण भूमिका खेल्ने अपेक्षा गरिएको छ।
सामसुङ एसडीएस, जुन समूहको आइटी र लजिस्टिक शाखा हो, त्यसले दक्षिण जियोला र गुमीमा दुई एआई डाटा सेन्टरहरू स्थापना गर्ने कम्पनीले जनाएको छ। एआई–ईन्धनको बढ्दो मागका कारण सामसुङ इलेक्ट्रोनिक्सको तेस्रो त्रैमासिक नाफा अघिल्लो वर्षको सोही अवधिको तुलनामा ३० प्रतिशतभन्दा बढीले बढेको छ।
यो विशाल लगानी घोषणा दक्षिण कोरियाली सरकारले अर्को वर्ष आर्टिफिसियल इन्टेलिजेन्समा तीन गुणा बढी खर्च गर्ने प्रतिबद्धता व्यक्त गरेपछि आएको हो। अमेरिकी राष्ट्रपति ली जे म्युङले ‘एआई युगको सुरुवात’ गर्ने र देशलाई संयुक्त राज्य अमेरिका र चीनपछि विश्वको शीर्ष तीन एआई शक्तिमध्ये एक बनाउने प्रतिबद्धता व्यक्त गरेका छन्। यद्यपि, विश्वव्यापी रूपमा बढिरहेको एआई–सम्बन्धित खर्च र आकासिँदो प्रविधिको शेयर मूल्याङ्कनले एआई बजारमा देखिएका फोका फुट्न सक्ने चिन्ता पनि बढाएको छ।
