काठमाडौँ । झण्डै चार वर्षदेखि जारी रुस-युक्रेन युद्ध अन्त्य गर्ने उद्देश्यका साथ अमेरिकी राष्ट्रपति डोनाल्ड ट्रम्प र युक्रेनी राष्ट्रपति भोलोदिमर जेलेन्स्कीबीच आइतबार (आज) फ्लोरिडामा महत्त्वपूर्ण भेटवार्ता हुँदैछ। राष्ट्रपति ट्रम्पको निजी क्लब 'मार-ए-लागो' मा हुने यस भेटलाई युद्धविराम र शान्ति स्थापनाका लागि 'निर्णायक मोड' का रूपमा हेरिएको छ।
भेटका क्रममा सुरक्षा ग्यारेन्टी, आर्थिक सम्झौता र विवादित क्षेत्रीय मुद्दाहरूमा केन्द्रित रहेर छलफल हुने बताइएको छ। राष्ट्रपति जेलेन्स्कीले युक्रेन शान्तिका लागि तयार रहेको तर वार्ताको टेबुलमा आफ्नो पक्ष बलियो हुनुपर्ने अडान राख्दै आउनुभएको छ। पछिल्लो समय २० बुँदे शान्ति प्रस्तावको मस्यौदा ९० प्रतिशत तयार भइसकेको र अमेरिकाले युक्रेनलाई नाटो सदस्य सरहकै सुरक्षा सुनिश्चितता दिने विषयमा सहमति जनाएको चर्चाले विश्व राजनीतिको ध्यान तानेको छ।
विशेष गरी पूर्वी युक्रेनको डोनबास क्षेत्रको भविष्य र रुसी कब्जामा रहेका भूभागका विषयमा मस्को र किएभबीच अझै गहिरो मतभेद छ। रुसी राष्ट्रपति भ्लादिमिर पुटिनले कब्जा गरिएका क्षेत्रलाई रुसी भूभागका रूपमा मान्यता दिनुपर्ने माग गरिरहनुभएको छ भने युक्रेनले यसलाई अस्वीकार गर्दै आएको छ। यद्यपि, यदि रुस पछि हटेमा पूर्वी क्षेत्रलाई अन्तर्राष्ट्रिय निगरानीमा असैन्यीकृत क्षेत्र बनाउन सकिने सङ्केत जेलेन्स्कीले दिएका छन्।
यसैबीच, क्यानाडाले युक्रेनको पुनर्निर्माणका लागि थप २ अर्ब ५० करोड क्यानेडियन डलर सहयोगको घोषणा गरेको छ। अमेरिकी विशेष दूत र ट्रम्पका सल्लाहकारहरूसँगको निरन्तरको संवादपछि हुन लागेको यो उच्चस्तरीय भेटले आगामी साताहरूमा युद्धको भविष्य तय गर्ने विश्लेषकहरूको ठम्याइ छ। राष्ट्रपति ट्रम्पले आफ्नो कार्यकालको सुरुवातमै यो युद्ध अन्त्य गर्ने प्रतिबद्धता जनाएका थिए।
