दाहालको शोकमा कांग्रेसले आइतबार २७ गते पार्टीको केन्द्रीय, प्रदेश र जिल्ला कार्यालय बन्द गर्ने [भिडियो]
हाम्रा कुरा
प्रकाशित २०८२ पुष २६ शनिबार
801
Shares
काठमाडौँ । नेपाली कांग्रेसले वरिष्ठ पत्रकार एवं पूर्वमन्त्री होमनाथ दाहालको निधनमा शोक प्रस्ताव पारित गरेको छ । शनिबार बिहान बसेको केन्द्रीय समितिको बैठकले दाहालको निधनमा शोक प्रस्ताव पारित गरेको हो ।
दाहाल २०५६ को आम निर्वाचनमा ओखलढुंगा निर्वाचन क्षेत्र नं १ बाट नेपाली कांग्रेसको तर्फबाट प्रतिनिधि सभा सदस्य पदमा निर्वाचित भएका थिए ।
साथै उनले कृषि तथा सहकारी मन्त्रीको जिम्मेवारीसमेत सम्हालेका थिए । दाहालले पार्टीको विभिन्न जिम्मेवारीमा रहेर नेपाली कांग्रेसको संगठन विस्तार र नेपालको लोकतान्त्रिक आन्दोलनमा नेतृत्वदायी भूमिका निर्वाह गरेको कार्यवाहक सभापति पूर्णबहादुर खड्काले बताए ।
पुस २६, २७ र २८ गतेसम्म पार्टीको केन्द्रीय, प्रदेश, जिल्ला कार्यालयहरूमा पार्टीको झण्डा आधा झुकाउने, पुस २७ गते, केन्द्र, प्रदेश र जिल्लाका सबै कार्यालय बन्द गर्ने निर्णय भएको बताए ।
कार्यवाहक सभापति खड्काकाअनुसार पार्टीले स्वर्गारोहणको १३ दिनसम्म केन्द्र, प्रदेश र जिल्ला कार्यालयमा शोक पुस्तिका राख्ने, १३औं दिनमा ओखलढुंगामा शोकसभाको आयोजना गर्ने प्रस्ताव प्रस्तुत गरेका थिए ।
प्रस्तावलाई केन्द्रीय समितिले सर्वसम्मत पारित गरेको छ । दाहालको शनिबार बिहान निधन भएको थियो।
