इरानी ट्याङ्करमा आक्रमण भए अमेरिकी लक्ष्यमा प्रहार गर्ने चेतावनी
हाम्रा कुरा
प्रकाशित २०८३ वैशाख २७ आइतबार
1k
Shares
काठमाडौँ । इरानी ट्याङ्कर तथा व्यापारिक जहाजहरूमाथि आक्रमण गरिएमा क्षेत्रीय रूपमा रहेका अमेरिकी लक्ष्यहरूमा कडा प्रतिक्रिया दिने इरानको इस्लामिक रिभोलुसनरी गाड्र्स (आईआरजीसी) ले चेतावनी दिएको छ। इरानी सञ्चारमाध्यमका अनुसार गाड्र्सले इरानी ढुवानीमा हुने कुनै पनि अवरोध वा आक्रमणको गम्भीर जवाफ दिइने स्पष्ट पारेका छन्।
यो कडा अभिव्यक्ति ओमानको खाडीमा बढ्दो तनावका बीच आएको हो। यसै सन्दर्भमा अमेरिकी राष्ट्रपति डोनाल्ड ट्रम्पले इरानले पछिल्लो शान्ति प्रस्तावमा छिट्टै प्रतिक्रिया दिने अपेक्षा व्यक्त गरेका छन्, यद्यपि इरानले हालसम्म आफ्नो आधिकारिक धारणा सार्वजनिक गरिसकेको छैन।
इरानका विदेशमन्त्री अब्बास अराघचीले पछिल्ला घटनाक्रमले कूटनीतिक प्रक्रियामा थप चुनौती थपेको बताएका छन्। उनले सबै पक्षलाई संयमता अपनाउन र संवादलाई प्राथमिकता दिन जोड दिएका छन्। हर्मुज जलमार्ग र खाडी क्षेत्रमा पछिल्ला दिनहरूमा समुद्री मार्ग र ऊर्जा ढुवानी सुरक्षालाई लिएर विश्वव्यापी चासो बढेको छ।
यसैबिच, खार्ग टापु नजिकै तेल चुहावटको सङ्केत देखिएपछि सम्बन्धित निकायहरूले निगरानी बढाएका छन्। चुहावटको वास्तविक कारण अझै स्पष्ट भइसकेको छैन। खाडी क्षेत्रमा देखिएको यो पछिल्लो अस्थिरताले क्षेत्रीय शान्ति र स्थायित्वका लागि कूटनीतिक प्रयासहरूको आवश्यकतालाई पुनः उजागर गरेको छ।
