काठमाडौँ । सङ्घीय संसदअन्तर्गत प्रतिनिधि सभाको बैठक आज बिहान ११:०० बजे बस्दैछ। आजको बैठकका लागि बजेट आश्रित विधेयकहरू पारित गर्नेदेखि लिएर विभिन्न नयाँ संशोधन विधेयकहरू दर्ता एवं पेस गर्नेसम्मका महत्त्वपूर्ण कार्यसूचीहरू तय गरिएका छन्।
बैठकको सुरुमा सभामुखले राष्ट्रपतिको कार्यालयबाट प्राप्त विधेयक प्रमाणीकरण सम्बन्धी पत्रको बेहोरा पढेर सुनाउने कार्यक्रम रहेको छ। त्यसपछि प्रधानमन्त्री बालेन्द्र साहको तर्फबाट विज्ञान, प्रविधि तथा नवप्रवर्तनमन्त्री महावीर पुनले महालेखा परीक्षकको त्रिसट्ठीऔँ वार्षिक प्रतिवेदन, २०८३ सदनसमक्ष पेस गर्नेछन्। मन्त्री पुनले नै प्रधानमन्त्रीको तर्फबाट ‘सार्वजनिक खरिद (दोस्रो संशोधन) विधेयक, २०८३’ लाई प्रस्तुत गर्न अनुमति माग्ने प्रस्ताव राख्दै उक्त विधेयक सदनमा प्रस्तुत गर्ने कार्यसूची छ।
यसैगरी बैठकमा अर्थमन्त्री डा. स्वर्णिम वाग्लेले ‘सम्पत्ति शुद्धीकरण (मनि लाउन्डरिङ्ग) निवारण (तेस्रो संशोधन) विधेयक, २०८३’ प्रस्तुत गर्न अनुमति माग्ने प्रस्तावसहित विधेयक पेस गर्नेछन्। भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले देशमा देखिएको सहकारी संकट र व्यवस्थापनलाई सम्बोधन गर्न ‘सहकारी (पहिलो संशोधन) विधेयक, २०८३’ प्रस्तुत गर्ने अनुमति माग्दै विधेयक प्रस्तुत गर्ने कार्यक्रम रहेको छ भने स्वास्थ्य तथा खाद्य स्वच्छतामन्त्री निशा मेहताले ‘स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने विधेयक, २०८३’ सदनमा पेस गर्नेछिन्।
आजको बैठकमा आर्थिक वर्ष २०८३/८४ को बजेटलाई पूर्णता दिनका लागि आर्थिक विधेयक र ऋण उठाउने विधेयकहरूमाथि छलफल र पारित गर्ने प्रक्रिया समेत अघि बढाइनेछ। जसमा ‘आर्थिक विधेयक, २०८३’ माथि प्राप्त विभिन्न संशोधनहरूमाथि सदनमा छलफल गरी तिनलाई निर्णयार्थ प्रस्तुत गरिनेछ र त्यसपछि अर्थमन्त्री डा. स्वर्णिम वाग्लेले उक्त विधेयकलाई पारित गरियोस् भनी प्रस्ताव प्रस्तुत गर्नेछन्।
त्यस्तै ‘राष्ट्र ऋण उठाउने विधेयक, २०८३’ माथिको दफावार छलफल सदनमा गरियोस् भनी प्रस्ताव प्रस्तुत भएपछि प्राप्त संशोधनहरूलाई निर्णयार्थ प्रस्तुत गरिनेछ र अर्थमन्त्री वाग्लेले यसलाई पनि पारित गरियोस् भन्ने प्रस्ताव गर्नेछन्। बैठकको अन्त्यमा सभामुखले प्रतिनिधि सभाका पूर्वसदस्य राजेन्द्र खरेलको निधनप्रति गहिरो दुःख व्यक्त गर्दै शोक प्रस्ताव प्रस्तुत गर्ने कार्यसूची रहेको छ।
