काठमाडौँ । सन् २०२६ को विश्वकप फुटबलको क्वार्टरफाइनल समीकरण सहआयोजक देश बिना नै हुने भएको छ । तीन देशले सहयाओजना गरेको जारी विश्वकपका तीन ओटै देश प्रिक्वार्टरफाइनलबाटै बाहिरिएसँगै क्वार्टरफाइनल भिडन्त सहआयोजक बिना नै हुन लागेको हो । 

सहआयोजकहरू अमेरिका, मेक्सिको र क्यानाडा प्रिक्वार्टरफाइनलको भिडन्तबाटै बाहिरिएका छन् । मेक्सिकोको खेल बाहेक अन्य टिमको भिडन्त प्रिक्वार्टरफाइलनमा फितलो रह्यो । 

अमेरिका बेल्जियमसँग पराजित
अमेरिकालाई बेल्जियमले पराजित गर्यो । आज भएको प्रिक्वार्टरफाइनलमा अमेरिकालाई ४–१ ले पराजित गर्दै बेल्जियम अन्तिम आठमा पुगेको हो । 

बेल्जियमले ९ मिनेटमै गोल गर्दै अग्रता लियो । चार्लस डे केटेलएरेको गोलमा बेल्जियमले अग्रता लिएको हो । उनले निकोलस रस्किनको पासमा गोल गरेका हुन् । 

३१ औँ मिनेटमा अमेरिकी खेलाडी मलिक टिलमानले फ्रिकमार्फत सुन्दर गोल गर्दै टिमलाई १–१ को बराबरीमा ल्याए । 

त्यसको दुई मिनेटमै बेल्जियमका चार्लसले दोस्रो गोल गर्दै टिमलाई २–१ ले अग्रता दिलाए । उनले लिआन्द्रो ट्रोसार्डको पासमा हेड गोल गरेका हुन् । 

त्यस्तै ५७ औँ मिनेटमा हान्स भानाकेनले चार्लसको पासमा गोल गरे । 

इन्जुरी समयको तेस्रो मिनेटमा रोमेलु लुकाकूले गोल गर्दै बेल्जियमलाई ४–१ ले जिताए । लुृकाकू बेल्जियमका लागि सर्वाधिक गोल गर्ने खेलाडी हुन् ।

यो हारसँगै अमेरिकाको तेस्रो पटक विश्वकपको क्वार्टरफाइनलमा पुग्ने चाहना चकनाचुर भयो । 

अमेरिका सन् १९३० को पहिलो संस्करण र सन् २००२ मा क्वार्टरफाइनलमा पुगेको थियो । 

बेल्जियम भने दुई पटक सेमिफाइनलमा पुगेको छ । सन् २०१८ को विश्वकपमा तेस्रो भएको बेल्जियम १९८६ मा चौथो भएको थियो । 

मेक्सिको इङ्गल्याण्डसँग पराजित

सोमबार भएको तनावपूर्ण खेलमा मेक्सिकोलाई ३–२ ले पराजित गर्दै इङ्गल्याण्ड क्वार्टरफाइनलमा पुगेको हो । खेलमा निकै नै तनाव भएको थियो । मध्यान्तरसम्म २–१ ले अग्रता लिएको इङ्गल्याण्डले मध्यान्तरपछि एक गोल गर्दा एक गोल खाएको थियो ।

साथै खेलको ५४ औँ मिनेटमा फल खेलेका जारेल क्वान्साहले रातो कार्ड खाएसँगै इङ्गल्याण्ड १० जनामा समेटिएको थियो । भीएआरबाट क्वान्साहले रातो कार्ड खाएका हुन् ।  

त्यसअघि खेलको ३६ औँ मिनेटमा जुड बेलिङ्घमले इङ्गल्याण्डलाई प्रारम्भिक अग्रता दिलाए । बुकायो साकाको पासमा बेलिङ्घमले गोल गरेका हुन् । 

त्यसको दुई मिनेटमै बेलिङ्घमले अर्को गोल थपे । ह्यारि केनको पासमा बेलिङ्घमले दोस्रो गोल गरेका हुन् । 

४२ औँ मिनेटमा मेक्सिकोका युलियन क्विनोनेसले गोल गर्दै अन्तर २–१ मा झारे । मध्यान्तरको इन्जुरी समयमा मेक्सिकोले निकै दबाबमा राखे पनि गोल भने गर्न सकेन । 

५४ मिनेटपछि १० जनामा समेटिएको भए पनि इङ्गल्याण्डले ६० औँ मिनेटमा तेस्रो गोल गर्यो । मेक्सिकोका खेलाडीले पेनाल्टी क्षेत्रभित्र फाउल गरेपछि पाएको पेनाल्टीलाई ह्यारि केनले गोलमा परिणत गरेका थिए । 

६९ औँ मिनेटमा भीएआरबाट निर्णय लिई मेक्सिकोलाई पेनाल्टी दिइयो । राउल जिमेनेजले पेनाल्टीलाई गोलमा परिणत गर्दै मेक्सिकोलाई ३–२ को स्थितिमा ल्याए । 

त्यसपछि दुवैतर्फ कुनै गोल नहुँदा इङ्गल्याण्ड ३–२ को जितसहित क्वार्टरफाइनलमा प्रवेश गरेको हो । 

खेलका क्रममा इङ्गल्याण्डका एक खेलाडीलाई रातो कार्ड तथा चार खेलाडीलाई पहेँलो कार्ड देखाइएको थियो । त्यस्तै मेक्सिकोका दुई खेलाडीलाई पहेँलो कार्ड देखाइएको थियो । 

इङ्गल्याण्डले सात ओटा फाउल खेल्दा मेक्सिकोले १४ ओटा फाउल खेलेको थियो । घरेलु मेक्सिको सिटीको मैदानमा खेलेको मेक्सिकोले ६७ प्रतिशत बल आफ्नो नियन्त्रणमा लिएको भए पनि जित भने हासिल गर्न सकेन । 

मेक्सिको अहिलेसम्म दुई पटक क्वार्टरफाइनलमा पुगेको छ । सन् १९७० र १९८६ मा मेक्सिको क्वार्टरफाइनलमा पुगेको थियो । 

सबैभन्दा बढी आयोजना गर्ने राष्ट्र भने बनेको छ । मेक्सिकोले तीन पटक सन् १९७०, १९८६ र अहिले गरी तीन पटक विश्वकप आयोजना गरेको हो । 

यता सन् १९५० देखि विश्वकप खेल्न थालेको इङ्गल्याण्डले अहिलेसम्म एकपटकमात्र उपाधि जितेको छ । सन् १९६६ को उपाधि जितेपछि उसले उपाधि उचाल्न सकेको छैन । 

इङ्गल्याण्ड दुई पटक सेमिफाइनलमा पुगेको छ भने ७ पटक क्वार्टरफाइनलमा पुगेको छ । पछिल्लो समय सन् २०१८ मा चौथो भएको इङ्गल्याण्ड २०२२ मा क्वार्टरफाइनलमा पुगेको थियो । र, यसपालि पनि क्वार्टरफाइनलमा पुगेको छ । 

विश्वकपको अन्तिम ३२ मा मेक्सिकोले इक्वेडरलाई २–० ले हराएको थियो भने इङ्गल्याण्डले डीआर कंगोलाई २–१ ले पराजित गरेको थियो ।

क्यानाडा मोरक्कोसँग पराजित
प्रिक्वार्टरफाइनलमा सहआयोजक क्यानाडालाई सहजै ३–० ले पराजित गर्दै मोरक्को अन्तिम आठमा पुगेको हो । मोरक्कोलाई जिताउन मध्यान्तरपछि एज्जेडाइन ओनाहीले दुई तथा सोफियानाले रहिमीले एक गोल गरे । खेलमा दुवैतर्फ चार चार ओटा पहेँलो कार्ड देखाइएको थियो । 

क्यानाडाले ४५ प्रतिशत बल आफ्नो नियन्त्रणमा लिन सफल भए पनि गोल भने गर्न सकेन । क्यानाडाले गोलका लागि तीन ओटा प्रहार गरे पनि गोलकिपरले विफल बनाइदिए । मोरक्कोले भने चार प्रहार गरेकामा तीन ओटालाई गोलमा परिणत गर्यो । 

मोरक्कोले नेदरल्याण्ड्सलाई पेनाल्टी सुटआउटमा ३–२ ले हराएर अन्तिम अन्तिम १६ मा स्थान बनाएको थियो । त्यस्तै क्यानाडाले पहिलो पटक यो सफलता हासिल गर्ने क्रममा दक्षिण अफ्रिकालाई १–० ले हराएको थियो ।

मोरक्को सन् २०२२ को विश्वकपमा सेमिफाइनलमा पुगेर उक्त सफलता हासिल गर्ने पहिलो अफ्रिकी र अरब राष्ट्र बनेको थियो । 

 को को पुगे क्वार्टरफाइनलमा ? 

यसअघि नर्वे, मोरक्को र इङ्गल्याण्ड, स्पेन र बेल्जियम क्वार्टरफाइनलमा पुगिसकेका छन् । 

क्यानाडालाई ३–० ले हराउँदै मोरक्को क्वार्टरफाइनलमा पुगेको हो । 

त्यस्तै ब्रजिललाई २–१ ले हराउँदै नर्वे चौथो सहभागितामा पहिलो पटक क्वार्टरफाइनलमा पुगेको हो । 

त्यस्तै इङ्गल्याण्डले मेक्सिकोलाई ३–२ ले हराएर क्वार्टरफाइनलमा स्थान बनायो । 

स्पेनले पोर्चुगललाई १–१ ले हराएर क्वार्टरफाइनलमा स्थान पक्का गर्यो । 

बेल्जियमले अमेरिकालाई ४–१ ले हराएर क्वार्टरफाइनलमा स्थान पक्का गर्यो ।