भूमध्यसागरीय क्षेत्रमा समुन्द्री सतहको तापक्रमले तोड्यो अहिलेसम्मकै रेकर्ड
हाम्रा कुरा
प्रकाशित २०८३ असार २६ शुक्रबार
215
Shares
काठमाडौँ । स्पेनको भूमध्यसागरीय क्षेत्रमा समुन्द्री सतहको तापक्रमले इतिहासकै नयाँ रेकर्ड कायम गरेको छ। जुन महिनाको अन्त्यमा यहाँको पानीको औसत तापक्रम २६.६३ डिग्री सेल्सियस पुगेको छ, जुन यसअघिका सबै रेकर्डभन्दा बढी हो।
स्पेनको सरकारी मौसम विज्ञान निकायका अनुसार सामान्यतया अगस्ट महिनाको दोस्रो सातामा समुन्द्री पानी सबैभन्दा तातो हुने गर्दछ। तर यस वर्ष जुन महिनामै देखिएको यो तापक्रमले अगस्टको ऐतिहासिक औसतलाई समेत उछिनेको छ। गत बुधवार स्पेनको भूमध्यसागरीय तटमा पानीको तापक्रम २३ देखि २८ डिग्री सेल्सियसको बीचमा रेकर्ड गरिएको थियो। मौसम एजेन्सीको पूर्वानुमान अनुसार क्याटालोनिया र अन्डालुसिया बीचका अधिकांश पर्यटकीय तटहरूमा तापक्रम २७ डिग्री सेल्सियस पुगेको छ भने बेलियारिक टापु समूहमा पानीको तापक्रम २९ डिग्री सेल्सियससम्म मापन गरिएको छ।
समुन्द्री तापक्रममा आएको यो अस्वाभाविक वृद्धि केवल स्पेनमा मात्र सीमित नभई विश्वव्यापी जलवायु परिवर्तनको सङ्केत भएको विज्ञहरूले बताएका छन्। कोपर्निकस क्लाइमेट चेन्ज सर्भिस र कोपर्निकस मरिन सर्भिसले जुलाईको सुरुमा जारी गरेको प्रतिवेदनअनुसार विश्वव्यापी समुन्द्री सतहको तापक्रमले सन् २०२३ र २०२४ का अघिल्ला कीर्तिमानहरूलाई समेत पार गरिसकेको छ।
बार्सेलोनाका तटहरूमा पुग्ने पर्यटक तथा स्थानीय बासिन्दाहरूले पानीमा महसुस गरिएको यो वृद्धिप्रति गम्भीर चिन्ता व्यक्त गरेका छन्। स्थानीय बासिन्दाहरूका अनुसार जलवायु परिवर्तनका कारण समुन्द्री तटमा बालुवाको मात्रा घट्दै गएको छ र अत्यधिक गर्मीले गर्दा दैनिक जनजीवन प्रभावित हुन थालेको छ।
बार्सेलोनामा बसोबास गर्दै आएका विदेशी नागरिकहरूले पनि विगतका वर्षहरूको तुलनामा यस वर्षको गर्मी निकै तीव्र र कष्टकर रहेको बताएका छन्। विज्ञहरूले यसलाई पृथ्वी तीव्र गतिमा तातिँदै गएको गम्भीर सङ्केतका रूपमा व्याख्या गर्दै जलवायु संकटविरुद्ध विश्वले बेलैमा उचित कदम चाल्नुपर्नेमा जोड दिएका छन्।
