विवेकशील साझा पार्टीका प्रवक्ता डा. सूर्यराज आचार्यले राष्ट्रियसभा निर्वाचनमा विवेकशील साझा पार्टीले नेपाली कांग्रेसलाई नभएर राधेश्याम अधिकारीलाई समर्थन गरेको बताएका छन् । अधिकारीका बारेमा धेरै अध्ययन र छलफलपछि राष्ट्रिय सभामा अधिकारी आवश्यक पर्ने व्यक्ति भएको निष्कर्ष निकालेर समर्थन गरेको उनकाे भनाई छ । अधिकारीले भनेका छन्,  'कुनै व्यक्तिका बारेमा टिप्पणी गर्नुअघि उसका बारेमा बुझेर बोल्दा राम्रो हुन्छ ।' हामीले अाचार्यसँग संक्षिप्त कुरा गरेका छाैँ ।

० राष्ट्रियसभाको निर्वाचनमा कांग्रेस उम्मेदवारलाई समर्थन गरेपछि तपाईंहरुको पार्टीको आलोचना सुरु भयो नि ?
– राष्ट्रिय सभाको निर्वाचनमा नेपाली कांग्रेसका उम्मेदवारलाई हाम्रो पार्टीले समर्थन गरेको छैन । अधिवक्ता राधेश्याम अधिकारीलाई हामीले व्यक्तिगत समर्थन गरेका हौं । नेपाली कांग्रेसको एजेन्डामा सहमत भएको होइन, उनीहरुसँग दीर्घकालीन सहकार्य गरेका होइनौं । सत्ताधारी दल नेपाली कांग्रेस तमाम विकृतिको जिम्मेवार पक्ष हो । विकृति राज्य सत्ता सञ्चालनको शैली, राज्य दोहनको शैलीको हामीले कडा प्रतिवाद गरेका छौं । कांग्रेसको समग्र प्रवृत्तिको हामी विपक्षमा छौं ।
त्यसो हुँदाहुँदै पनि अहिलेको परिस्थितिमा राष्ट्रियसभा निर्वाचनमा हाम्रो मतभारले आफ्नो उम्मेदवार जिताउन सक्ने अवस्था थिएन । तर, दुईवटा गठबन्धनको परिणामलाई तलमाथि पार्न सक्थ्यौं । हाम्रो पार्टीले प्रतिपक्षी बेन्चलाई नै सबल बनाउने, तर उहाँहरुले भनेको उम्मेदवार होइन, हामीले रोजेको उम्मेदवारलाई सहयोग गर्ने निर्णय गरेका हौं ।

० तपाईंहरुले रोजेको व्यक्ति भ्रष्टाचारकाे सजाय पाएकालाई उम्मेदवार बन्न दिनुपर्छ भनि ऐनमा स‌ंशाेधन हाल्ने व्यक्ति होइन ?
– सञ्चारमाध्यमले व्यक्तिलाई ट्राइल गर्नु सरासर गलत हो । हामीले राधेश्याम अधिकारीको नाममा सहमति जनाउनुभन्दा पहिला उहाँका बारेमा पर्याप्त सूचना लिएका थियौं । उहाँले भ्रष्टाचारीलाई बोकेर हिडेका हुन कि कानुनविद्को हैसियतले विधिशास्त्रको सैद्धान्तिक अडान थियो भन्ने कुरामा हामीले धेरैसँग राय परामर्श लिएका हौं । एउटा अपराधका लागि दुई पटक सजाय हुन्न भन्ने विधिशास्त्रको सैद्धान्तिक अडान हो भन्ने हामीले निष्कर्ष निकाल्यौं । यद्यपि उहाँको त्यो अभिव्यक्तिको हामी विपक्षमै छौं ।
कुनै पनि व्यक्तिका बारेमा हचुवाको भरमा एउटा अखवार अथवा अनलाइन सोसलमिडियाका आधारमा राधेश्यामले भ्रष्टाचारीले चुनाव लड्न पाउनुपर्छ भन्ने सैद्धान्तिक अडानलाई भ्रष्टाचारीलाई बोकेर हिड्यो भन्नु गलत हो ।

० कांग्रेसलाई नै भोट हाल्नुपर्ने बाध्यता ?
– परम्परागत हाम्रो राजनीति असहिष्णु छ । हामीले अभ्यास गर्दै आएको ३० वर्षको यो दलीय राजनीतिमा राम्रो काम गरेको भए पनि अर्को दलको व्यक्तिको विरोध गर्नैपर्ने । मिडिया र सार्वजनिक बहसमा पनि यी कुरा त्रुटीपूर्ण रहेको छ । विवेकशील साझा पार्टीले सुसंस्कृत राजनीति भनेको छ । यदि राष्ट्रहित, असल र विकास समृद्धिका कुरामा आफ्नो पार्टीभन्दा फरक दल वा दलका नेताले असल काम गरेका छन् भने त्यसको प्रशंसा गर्न लाज मान्नुपर्दैन । यो हाम्रो पार्टीको नीति नै हो ।