धुन्चे (रसुवा) । नेपाल र चीनका अधिकारीबीच सीमा क्षेत्रका गतिविधिका बारे यथेष्ट सुरक्षा व्यवस्था मिलाउन आइतबार उत्तरी रसुवाको स्याफ्रुबेसीमा छलफल भएको छ ।
सीमाक्षेत्रमा रहेका दुवै देशका सुरक्षा निकायले अवैध कारोबार पूर्ण रुपमा रोक्ने र नेपाल आयात हुने सामान लिन केरङ जाने कन्टेनरका चालकलाई स्थायी अनुमतिपत्र र घुमफिरका लागि केरुङ जाने नेपालीका लागि एकदिने अनुमतिपत्र दिने व्यवस्था हुन नेपाली अधिकारीले चिनियाँ पक्षसँग आग्रह गरेको बताइएको छ ।
रसुवा जिल्लाभन्दा बाहिर जिल्लाका चालकहरू रसुवागढी नाकाबाट केरुङ जान नपाई स्थानीय चालक खोजेर कन्टेनर केरुङ पठाइदिनुपर्दा सवारीधनीलाई बढी व्ययभार भएको गुनासो ध्यानमा राख्दै स्थानीय प्रशासनको पहलमा दुई देशका अधिकारीबीच आइतबार छलफल भएको प्रजिअ शिवराम गेलालले जानकारी दिए ।
छलफलमा नेपालका तर्फबाट नेपाल प्रहरी, सशस्त्र प्रहरी बल, सीमा सुरक्षा बल र राष्ट्रिय अनुसन्धान विभागका प्रतिनिधि तथा चिनियाँ पक्षबाट सीमाक्षेत्र हेर्ने उच्च अधिकारी सहभागी रहेका थिए ।
