जनकपुरधाम। प्रदेश नं २ मा साहु महाजनबाट चर्को ब्याजमा ऋण लिई वैदेशिक रोजगारीमा जाने बाध्यात्मक अवस्थाको अन्त्य गर्ने लक्ष्य लिई विनाधितो ऋण प्रवाहलाई प्रभावकारी बनाइएको छ। प्रदेश नं २ को सरकार, सीप विकास परियोजना, नेपाल एसबीआई बैंक र प्रभु विकास बैंकबीच भएको सम्झौताअनुरूप सो योजनालाई प्रभावकारी बनाइएको हो। सो योजनाअन्तर्गत सीप विकास परियोजनाको सहयोगमा वैदेशिक रोजगारमा जाने युवालाई विनाधितो सहुलियत दरमा ऋण प्रवाह गरिँदै आएको छ
परियोजनाले प्रभु विकास बैंकमार्फत रौतहट, सप्तरी, सर्लाही, बारा र पर्सा तथा नेपाल एसबीआई बैंकले सिरहा, धनुषा र महोत्तरीमा यस्तो सुविधा उपलब्ध गराउँदै आएको जनाएको छ। प्रारम्भमा वैदेशिक रोजगारीमा जानेलाई मात्र सो सुविधा उपलब्ध भएकामा हाल जाने र फर्केकालाईसमेत सो सु्विधा उपलब्ध गराइएको छ। परियोजनाद्वारा धनुषा जिल्लाको लक्षमिनियाँको आप्रवासी बहुद्देश्यीय सहकारी संस्थामा आयोजित ऋण प्रवाह, प्रक्रिया, समस्या र समाधान विषयक छलफल कार्यक्रममा सो जानकारी दिइएको हो।
सो परियोजनाअन्तर्गत वैदेशिक रोजगारीबाट फर्केकालाई स्वरोजगारसम्बन्धी कार्य गर्न रू तीन लाख ऋण दिने गरेको छ भने वैदेशिक रोजगारीमा जानेलाई रू एक लाख ५० हजार ऋण सुविधा उपलब्ध गराउँदै आएको छ।
छलफल कार्यक्रमा नेपाल एसबीआइ बैंक जनकपुरका प्रमुख दीपेन्द्र ठाकुर र परियोजनाका प्रदेश प्रमुख मोहम्मद साविरले विनाधितो ऋण प्रवाह सहजीकरण, सरकारको अवधारणा, दक्ष जनशक्ति उत्पादन, सीपको उपादेयताबारे जानकारी गराएका थिए।
