प्रदर्शनकारीलाई २० वर्षसम्म जेल सजाय, सञ्चारकर्मीलाई चेतावनी

प्रकाशित २०७७ फागुन ४ मंगलबार

काठमाडौं । म्यानमारमा कू विरुद्ध प्रदर्शन गरिरहेकाहरुले सशस्त्र बलहरुमाथि अवरोध खडा गरेमा उनीहरुले २० वर्ष सम्मको जेल सजाय भोग्नुपर्ने हुन सक्ने सेनाले चेतावनी दिएको छ ।

सैन्य नेतृत्व प्रति ‘घृणा वा अवहेलना’ फैलाएको पाएमा उनीहरुलाई लामो जेल सजायका साथै जरिवानासमेत गराइने सेनाले जनाएको छ । म्यानमारका विभिन्न सहरहरुमा हतियार सहितका गाडीहरु गुडिरहेका बेला कानूनमा भएका परिवर्तनको घोषणा गरिएको हो ।

सेनाले गरेको उक्त कू विरुद्ध पछिल्ला दिनहरूमा विभिन्न सहरहरुमा हजारौँ सर्वसाधारणहरु प्रदर्शनमा उत्रिएका छन् । उनीहरुले आफ्नै निवासमा नजरबन्दमा रहेकी नेत्री आङ सान सू चीको रिहाइ र प्रजातन्त्रको पुर्नबहालीको माग गरिरहेका छन् ।

सोमवार सू चीका वकिलले उनलाई थप दुई दिन हालकै अवस्थामा राखिने जानकारी दिएको बीबीसीले लेखेको छ । उनीमाथि गैरकानुनी रूपमा आफ्नो सुरक्षार्थ खटिएका कर्मचारीहरूले प्रयोग गर्ने वाकिटकी राखेको लगायतका आरोप लगाइएको छ।

बीबीसी बर्मीजसँग कुरा गर्दै एउटा दूरसञ्चार प्रदायकले म्यान्मारमा लगातार दोस्रो रात इन्टरनेट सेवा अवरुद्ध पारिएको बताएको छ। सेनाले बोलेर, लेखेर वा साङ्केतिक सहित जुनसुकै रूपमा आफूहरूप्रति घृणा बढाउने काम गरेको पाए लामो जेल सजाय सहित जरिवानाको व्यवस्था गरिएको जनाएको छ।

आफ्नो वेबसाइटमा प्रकाशन गरिएको विज्ञप्तिमा उसले सुरक्षा निकायको काम कारबाहीमा अवरोध खडा गरेमा २० वर्ष सम्म जेल सजाय हुन सक्ने उल्लेख गरेको हो। त्यस्तै सर्वसाधारणहरूमा डर वा अशान्ति पैदा गर्न खोजेको पाइएमा तीन देखि सात वर्षसम्म जेल सजाय हुन सक्ने बताइएको छ।

सैन्य सरकारले पक्राउ गर्न सक्ने, खोजतलास गर्न सक्ने र मानिसहरूलाई अदालतको आदेश बिनै २४ घण्टासम्म पक्राउ गर्न सक्ने अधिकार शनिवार आफैलाई प्रत्यायोजन गरेको छ।

बीबीसीका अनुसार सञ्चारकर्मीहरुलाई सेनाको कदमलाई कू का रूपमा व्याख्या नगर्न भनिएको छ।