झापा । झापा जिल्लाको पूर्वी ब्यापारिक सहर बिर्तामोडमा कोरोना भाइरसको सम्भावित  प्रकोपलाई  मध्यनजर गर्दै नगरभित्र लाग्ने साप्ताहिक हाट बजार बन्द गर्ने निर्णय गरेको छ ।
 
 छिमेकी मुलुक भारतका विभिन्न राज्यमा कोरोना भाइरसको दोस्रो लहर देखिएपछि सरकारले पुनः जारी गरेको स्वास्थ्य मापदण्डको निर्देशनलाई मध्यनजर गर्दै बिर्तामोड नगरपालिकाले यस्तो निर्णय गरेको हो ।

नगर स्तरीय कोभिड १९ संक्रमण रोकथाम तथा नियन्त्रण समन्वय समिति सीसीएमसीका  संयोजक तथा  नगरप्रमुख धुव्रकुमार शिवाकोटीको अध्यक्षतामा मङ्गलबार बसेको बैठकले दोस्रो लहरको कोरोना संक्रमण नगरभित्र फैलिन नदिन साप्ताहिक हाटबजार बन्द गर्ने निर्णय गरिएको नगरपालिकाका फोकल पर्सन ओम खड्काले जानकारी दिएका छ्न्  । 

खड्काका अनुसार नगरभित्र बुधबारे हटिया, बिर्ताबजार, गरामनी, सैनिक बजार, चारपाने, चैतुबारी लगायतका स्थानमा साप्ताहिक हाटबजार लाग्दै आएकोले कोरोना भाइरस प्रकोपलाई मध्यनजर गर्दै ती  सम्पूर्ण हाटबजार केही समयका लागि बन्द गर्ने निर्णय गरिएको खड्काले बताए । 

त्यस्तै नगरभित्र २५ जनाभन्दा बढी मानिसहरुको भिडभाड हुन नदिन पनि बैठकले निर्णय गरेको छ । २५ जना भन्दा बढी उपस्थिति हुने खालका कार्यक्रम, बैठक, सेमिनार, गोष्ठीजस्ता कार्यक्रममाथि पनि रोक लगाउने निर्णय गरिएको उनले बताए । 

बैठकमा स्वास्थ्य मन्त्रालय र जिल्ला प्रशासन कार्यालय झापाबाट जारी स्वास्थ्य सुरक्षाका सम्पूर्ण मापदण्डहरू नगरभित्र पालना गर्ने र गराउने, अनिवार्य मास्क लगाउने, सेनिटाइजार प्रयोग गर्ने, सामाजिक दूरी कायम गर्ने, भिडभाड नगर्नेजस्ता निर्णयहरू गरिएको छ ।

बैठकमा नगरपालिका उपप्रमुख  पवित्रा महतारा प्रसाईँ, प्रमुख प्रशासकीय अधिकृत गणेशप्रसाद दाहाल, बिर्तामोड नगरपालिका  १० का वडा अध्यक्ष दुर्योधन गुरुङ, नेकपा एमालेका ज्ञानुराम प्रसाईँ, सशस्त्र प्रहरीका प्रहरी नायव उपरीक्षक गौतम योञ्जन, ईलाका प्रहरी कार्यालय बिर्तामोडका प्रहरी निरीक्षक विजय कार्की , जिल्ला ट्राफिक प्रहरी कार्यालयका प्रमुख प्रहरी निरीक्षक प्रकाश जवेगु , बिर्तामोड उद्योग वाणिज्य संघका निवर्तमान अध्यक्ष कुमार भट्टराई लगायतको उपस्थिति रहेको थियो । 

जिल्लाकै मुख्य व्यापारिक केन्द्र बिर्तामोडमा हालसम्म ७०१ जनामा कोरोना संक्रमण पुष्टि भएको छ । त्यसमध्ये १३ जनाको सङ्क्रमणबाट मृत्यु भएको जनाइएको छ । 

जिल्लाका १५ वटा स्थानीय तहमध्ये बिर्तामोड नगरपालिकाले पहिलो पटक साप्ताहिक हाट बजार बन्द गर्ने निर्णय गरेको छ ।