हरिद्धारमा सहभागी पूर्वराजारानी सकुशल, पीसीआर रिपोर्ट आउँदै, आइतबार फर्किदै
हाम्रा कुरा
प्रकाशित २०७८ वैशाख ३ शुक्रबार
629
Shares
काठमाडौं । भारतको उत्तराखण्डस्थित हरिद्धार कुम्भमेलामा सहभागी भएकाहरु थुप्रैमा कोरोना भाइरसको संक्रमण देखिएको भए पनि उक्त मेलामा सहभागी पूर्वराजा ज्ञानेन्द्र शाह र पूर्वरानी कोमल शाह भने सकुशल छन् ।
उनीहरुले उक्त मेलामा शाही स्नानसमेत गरेका थिए । अहिलेसम्म कुम्भमेलामा सहभागी भएका २ हजार १६७ जनामा कोरोनाको संक्रमण पुष्टि भइसकेको अवस्थामा पूर्वराजारानी भने सकुशल नै रहेको पाइएको हो ।
नेपालबाट पूर्वराजारानी गत चैत २६ गते हरिद्धार गएका थिए । उनीहरु हरिद्धार गए पनि बसाइ भने दिल्लीमै रहँदै आएको छ । पूर्वराजारानीसँगै पूर्वराजाका स्वकीय सचिव सागरप्रसाद तिमल्सिना र पूर्वराजाका पूर्व संवाद सचिव फणिराज पाठक पनि हरिद्धार गएका थिए ।
स्रोतका अनुसार उनीहरु पनि सुरक्षित छन् । हरिद्धार जानुअघि पनि पीसीआर परीक्षण गरिएको र फर्किँदा पनि पीसीआर परीक्षण गरिएको बताइएको छ ।
पूर्वराजारानी आइतबार काठमाडौं फर्किदै छन् । उनीहरुले बिहीबार साँझै पीसीआर परीक्षण गराएका छन् । यसको रिपोर्ट भने शुक्रबार साँझ आउँदै छ ।
स्रोतका अनुसार उनीहरुमा कुनै पनि समस्या नदेखिएकाले रिपोर्ट नेगेटिभ आउने अपेक्षा गरिएको छ ।
पूर्वराजारानीको यो भ्रमणलाई विशेष महत्वका साथ हेरिएको भए पनि कुनै खास राजनीतिक भेटघाट भने नभएको पाइएको छ ।
नेपालमा राजनीति अस्थिर भइरहँदा पूर्वराजाको तीर्थयात्रालाई खास मानिएको थियो । तर उत्तरप्रदेशका मुख्यमन्त्री योगी आदित्यनाथसमेत कोरोना संक्रमित भएसँगै थप भेट र छलफल भने हुन नसकेको पाइएको छ ।
