करेन्ट लागेर मृत्यु भएका राउत परिवारलाई पाँच लाख सहित उपयुक्त जागिरको व्यवस्था गरिने सहमति

गुल्मी संवाददाता

प्रकाशित २०७८ भदौ १४ सोमबार

गुल्मी। जिल्लाको मदाने गाउँपालिका –१ अग्लुङ्गका १८ वर्षीय विक्रम राउतका परिवारलाई नेपाल विद्युत् प्राधिकरणबाट पाँच लाख सहयोग र उपयुक्त जागिरको व्यवस्था गरिने सहमति भएको छ ।

सोमबार प्रमुख जिल्ला अधिकारी रुद्रादेवी शर्मा, मदाने गाउँपालिकाका अध्यक्ष दानबहादुर केसी, नेपाली काँग्रेसका जिल्ला सभापति भुवन प्रसाद श्रेष्ठ, प्रहरी उपरीक्षक (एस.पी) गोपालचन्द्र भट्टराई, अग्लुङ्गका काँग्रेस नेता राजेन्द्र विष्ट, विद्युत् कार्यालयका प्रमुख ईश्वरकुमार श्रेष्ठ लगायतले मृतकका बुवा पिङ्के राउत सहित अग्लुङ्गबाट आएको टोलिसँग नेपाल विद्युत् प्राधिकरणबाट पाँच लाख सहयोग र मृतकको एक जना आफन्तलाई योग्यताको आधारमा उपयुक्त जागिरको व्यवस्था गरिने सहमति भएको हो । सहमति पश्चात् मृतक राउतको शवलाई पोस्टमार्टम गरी परिवारको जिम्मा लगाइएको छ ।

मदाने गाउँपालिका वडा नं. २, सोइरेस्थित जङ्गलमा आइतबार गाई चराउन गएका राउत छाताको टुप्पो अचानक बिजुलीको तारमा छोइन जाँदा सोही तारबाट करेन्ट लागि घटनास्थलमै मृत्यु भएको प्रहरीले जनाएको छ ।

बिजुलीको तार अव्यवस्थित तरिकाले झुन्डाइएकाले दुर्घटना भएको स्थानीयहरूले बताएका छन् । पटक–पटक विद्युत् कार्यालयमा जानकारी गराउँदा पनि कार्यालयले बेवास्ता गरेको स्थानीयले आरोप लगाए ।