१२ देखि १५ वर्षका स्वस्थ्य बालबालिकालाई कोरोनाको खोप लगाउन पर्दैन ?

हाम्रा कुरा

प्रकाशित २०७८ भदौ १९ शनिबार

काठमाडौं । कोरोना भाइरसको महामारीका बेलामा हरकोहीलाई कोरोना भाइरस विरुद्धको खोप लगाउन जरुरी भनिएको छ । तर पछिल्लो एक सुझावले भने केही राहत दिएको पनि मानिन्छ ।

कोरोनाको तेस्रो लहरमा बालबालिका बढी प्रभावित हुने आँकलन भइरहँदा इङल्याण्डको भ्याक्सिन एडभाइजरी बोडी जेसीअीआईले १२ देखि १५ वर्षका स्वस्थ्य बालबालिकालाई कोरोनाको खोप लगाउन दिन अस्वीकार गरेको छ ।

इङल्याण्डमा भएको यो निर्णयले बालबालिकाका लागि लगाउने खोपमा नयाँ बहस हुने देखिएको छ । डेली मेलका अनुसार जेसीभीआईले शुक्रबार १२ देखि १५ वर्षका स्वस्थ्य बच्चाहरुमा भाइरसको खतरा कम रहेको पनि बताएको छ ।

जेसीभीआईले जो मृगौला, मुटु र फोक्सोको बिरामीसँग जोडिएका दुई लाख युवालाई भने खोप दिनुपर्ने बताएको छ ।

उसले कोरोना संक्रमित हुँदा १२ देखि १५ वर्षका बालबालिकामा १० हजारमा एक बिरामीको हालत गम्भीर हुन सक्ने आँकलन समेत गरेको छ । यसैलाई आधार बनाएर खोप लगाउन जरुरी नभएको समेत उसको निष्कर्ष छ ।

हाल क्यानडा, अमेरिकामा १२ देखि १५ वर्षका बालबालिकालाई खोप दिन थालिएको छ ।