काठमाडौं । आईसीसी विश्वकप क्रिकेट लिग–२ अन्तर्गत त्रिकोणात्मक एक दिवसीय क्रिकेट सिरिज सोमबारदेखि शुरु हुँदैछ । नेपाल, अमेरिका र ओमानबीच ओमानमा सिरिज हुन लागेको हो ।
सोमबारको पहिलो खेलमा नेपालले अमेरिकासँग खेल्देछ । यो खेल नेपाली समयअनुसार अपरान्ह ४ः१५ बजे शुरु हुनेछ । ज्ञानेन्द्र मल्लको कप्तानीमा मैदानमा उत्रने नेपाली टिममा उपकप्तान दिपेन्द्र सिंह ऐरी भने हुने छैनन् । उनी घाइते छन् ।
नेपाल र अमेरिकाबीच निकै नै टक्कर हुँदै आएको छ । लिग–२ अन्तर्गत नै नेपालले यसअघि घरेलु मैदानमा अमेरिकासँग दुई खेल खेलेको थियो । नेपालले दुबै खेल जितेको थियो।
तर ओमानको मैदानको अवस्था फरक भएकाले खेल प्रतिस्पर्धात्मक हुने कप्तान मल्ल बताउँछन् । सिरिजको अर्को टिम ओमान यसअघिको खेलमा नेपालसँग हावी भएको थियो ।
नेपालले दुवै खेल गुमाएको थियो । अभ्यासका क्रममा पपुवा न्यूगिनीमाथि दुवै खेल जितेको नेपालको अभ्यास राम्रो भएकाले जितको आशा कायम छ ।
सन्दीप लामिछानेले दुवै खेलमा गरेर १० विकेट लिएका थिए । उनी फर्ममा छन् । जसले गर्दा नेपालले अमेरिका र ओमानलाई दबाबमा राख्ने अनुमान गर्न सकिन्छ ।
नेपाली ब्याटिङ पनि ठीकठाक रहेको अनुमान गर्न सकिन्छ । रोहित पौडेलले ठूलो आशा जगाएका छन् । करण केसी फर्ममा छन् । कप्तान मल्लले पनि आफू फर्ममै भएको संकेत गरेका छन् ।
सिरिजमा नेपालको खेल
नेपालले दोस्रो खेलमा ओमानसँग मंगलबार नै प्रतिस्पर्धा गर्नेछ ।
नेपालले तेस्रो खेलमा अमेरिकासँग शुक्रबार प्रतिस्पर्धा गर्नेछ ।
अन्तिम खेलमा नेपालले ओमानसँग आगामी आइतबार खेल्नेछ ।
लिग–२ मा अंक तालिका
नेपालले अहिलेसम्म घरेलु मैदानमा ४ खेल खेलिसकेको छ । जहाँ नेपालले ४ अंक जोडेको छ । नेपाल ओमानसँग पराजित हुँदा अमेरिकासँग विजयी भएको हो ।
ओमान यो समूहको बलियो टिम हो । ओमानको १० खेलमा १६ अंक छ । १२ खेलमा १२ अंक जोडेको अमेरिका दोस्रो स्थानमा रहेको छ ।
नेपाल भने ४ खेलमा ४ अंकबाट छैटौं स्थानमा रहेको छ ।
