काठमाडौं । चौथो संस्करणको एभरेष्ट प्रिमियर लिग (ईपीएल) टी–२० क्रिकेटमा सोमबार दुई खेल हुँदैछन् । टियू क्रिकेट मैदानमा हुने पहिलो खेलमा काठमाडौं किङ्स–११ र विराटनगर वारियर्स भिड्ने छन् । यो खेल बिहान ९ः३० बजे शुरु हुनेछ ।
सन्दीप लामिछानेको कप्तानीमा रहेको काठमाडौं लगातार दोस्रो जित निकाल्न चाहन्छ । काठमाडौंले पहिलो खेलमा साविक विजेता ललितपुर प्याट्रियट्सलाई हराएको थियो ।
पाकिस्तानी पूर्व कप्तान शाहिद अफ्रिदी सम्मिलित काठमाडौं बलियो छ । अफ्रिदीले पहिलो खेलमा सबैभन्दा बढी रन आए । ब्याटिङमा आएनन् ।
उनले दुई खेलमात्र खेल्नेछन् ।
करण केसीको कप्तानीमा मैदान उत्रने विराटनगर भने पहिलो जित निकाल्न चाहन्छ । पहिलो खेलमा विराटनगर चितवन टाइगर्ससँग पराजित भएको थियो ।
सोमबारको दोस्रो खेल
सोमबारको दोस्रो खेलमा भैरहवा ग्लाडियटर्स र चितवन टाइगर्स खेल्नेछन् । भैरहवा र चितवनबीचको खेल दिउँसो १ः३० बजे शुरु हुनेछ ।
शरद भेषावकरको कप्तानीमा रहेको भैरहवा पहिलो जितको खोजीमा छ । वर्षाका कारण आइतबारको पहिलो खेलमा भैरहवाले पोखरा राइनोजसँग अंक बाँडेको थियो । खेल नतिजाविहीन भएसँगै दुवै टिमले १–१ अंक बाँडेका थिए ।
चितवन लगातार दोस्रो जित निकाल्न चाहन्छ । चितवनले पहिलो खेलमा विराटनगरलाई पराजित गर्न सफल भएको थियो ।
वर्षा खेल्दैछ भिलेन
आइतबारको पोखरा र भैरहवाबीचको खेल वर्षाले गर्दा पूरा हुन पाएन । यो खेलमा भैरहवा हावी भएको थियो । तर खेल पूरा नहुँदा भैरहवाका लागि वर्षा भिलेन बन्यो ।
सोमबारको मौसम पनि ठीक छैन । कुनै पनि बेला खेल रोकिन सक्छ ।
जल तथा मौसम पूर्वानुमान महाशाखाले वर्षा हुन सक्ने जनाएको छ ।
मनसुन सकिनै लाग्दा अझै तीन दिन वर्षा हुने महाशाखाको भनाइ छ ।
अन्तर्राष्ट्रिय खेलाडीहरुको समेत सहभागीता रहेको प्रतियोगिता हेर्न दर्शकले इच्छा गरे पनि त्यो इच्छालाई वर्षाले भिलेन खेल्न खोजिरहेको छ ।
