काठमाडौं । काठमाडौंमा चलिरहेको चौथो संस्करणको एभरेष्ट प्रिमियर लिग (ईपीएल) टी–२० क्रिकेटमा ‘गुलाब’ को असर देखिएको छ । गुलाब अर्थात् ‘गुलाब’ नामक शक्तिशाली चक्रवातका कारण आईपीएलका खेलहरु हुन सकिरहेका छैनन् । वर्षाका कारण चार खेलहरु पूरा हुन पाएनन् ।
सोमबारदेखि भारतको उडिसाको जमिनमा अवतरण भइसकेकाले यसको अप्रत्यक्ष परिधीय असरका कारण नेपालमा आंशिकदेखि सामान्य बदली भइरहेको मौसम पूर्वानुमान महाशाखाले जनाएको छ ।
यता टी–२० क्रिकेटमा बुधबार दुई खेलहरु हुँदैछन् । टियू क्रिकेट मैदानमा हुने पहिलो खेलमा डिफेन्डिङ च्याम्पियन ललितपुर प्याट्रियट्स र पोखरा राइनोजबीच प्रतिस्पर्धा हुनेछ । ललितपुर र पोखराबीचको खेल बिहान ९ः३० बजे शुरु हुनेछ ।
कुशल भुर्तेलको कप्तानीमा रहेको ललितपुर पहिलो जित निकाल्ने योजनामा । उद्घाटन खेलमा ललितपुर काठमाडौं किङ्स–११ सँग पराजित भएको थियो ।
विनोद भण्डारीको कप्तानीमा रहेको पोखरा पनि पहिलो जितको खोजीमा रहेको छ । पोखराले पहिलो खेलमा भैरहवा ग्लाडियटर्ससँग अंक बाडेको थियो । वर्षाको कारण खेल रद्द भएपछि पोखराले एक अंक पाएको थियो ।
बुधबारको दोस्रो खेल
यस्तै दोस्रो खेलमा भैरहवा र विराटनगर वारियर्सबीच प्रतिस्पर्धा हुनेछ । भैरहवा र विराटनगरबीचको खेल दिउँसो १ः३० बजे शुरु हुनेछ ।
शरद भेषावकरको कप्तानीमा मैदानमा उत्रने भैरहवा पहिलो जित निकाल्न चाहन्छ । वर्षाको कारण खेल रद्द हुँदा पहिलो खेलमा भैरहवाले पोखरासँग अंक बाडेको थियो ।
विराटनगर पनि पहिलो जित निकाल्न चाहन्छ । विराटनगर पहिलो खेलमा चितवन टाइगर्ससँग पराजित भएको थियो ।
