काठमाडौं । चौथो संस्करणको एभरेष्ट प्रिमियर लिग (ईपीएल) टी–२० क्रिकेटमा शनिबार दुई खेलहरु हुँदैछन् । टियू क्रिकेट मैदानमा हुने पहिलो खेलमा भैरहवा ग्लाडियटर्स र काठमाडौं किङ्स–११ बीच प्रतिस्पर्धा हुँदैछ । यो खेल बिहान ९ः३० बजे शुरु हुनेछ ।
शरद भेषावकरको कप्तानीमा रहेको भैरहवा दोस्रो जित निकाल्ने योजनामा छ । सन्दीप लामिछानेको कप्तानीमा रहेको काठमाडौं पनि दोस्रो जितको खोजीमा रहेको छ ।
दोस्रो खेल
शनिबारको स्रो खेलमा विराटनगर वारियर्स र पोखरा राइनोजबीच प्रतिस्पर्धा हुनेछ । विराटनगर र पोखराबीचको खेल दिउँसो १ः३० बजे शुरु हुनेछ ।
करण केसीको कप्तानीमा रहेको विराटनगर पहिलो जित निकाल्न चाहन्छ । विराटनगरले ३ खेलमा जित निकाल्न सकेको छैन ।
विनोद भण्डारीको कप्तानीमा रहेको पोखरा भने दोस्रो जित निकाल्न चाहन्छ ।
अंक तालिका–
चितवन ३ खेलबाट ६ अंकसहित शीर्ष स्थानमा रहेको छ । भैरहवा ३ खेलबाट ४ अंकसहित दोस्रो स्थानमा रहेको छ ।
ललितपुर पेट्रियाट्स ४ खेलबाट ३ अंकसहित तेस्रो तथा पोखरा ३ खेलमा ३ अंक जोडेर चौथो स्थानमा रहेको छ ।
काठमाडौं २ खेलमा २ अंक जोडेर पाँचौं स्थानमा रहेको छ ।
पुछारको अंकविहीन विराटनगर पुछारमा छ ।
कालोबादल
वर्षाले गर्दा अहिलेसम्म ईपीएलका चार खेल प्रभावित भएका छन् । शनिबारको खेलमा पनि कालो बादलले खेलमा असर पर्ने देखिएको छ ।
मनसुन सकिन अझै केही दिन बाँकी रहेको छ ।
समीकरण
६ टिम सहभागी ईपीएलमा लिग चरणका खेलहरु सकिएपछि शीर्ष दुई टोलीले क्वालिफायर १ मा प्रतिस्पर्धा गर्ने छन् । तेस्रो र चौथो स्थानमा रहने टिमले इलिमिनेटर खेल्नेछन् ।
हार्ने टिम बाहिरिने छ भने जित्ने टिमले पहिलो क्वालिफायरमा हारेको टिमसँग क्वालिफायर २ खेल्नेछ । यसरी जित्ने टिमले उपाधिका लागि फाइनल खेल्नेछन् ।
यसपटक पुरस्कार राशि पनि बढेको छ । विजेताले ५० लाख र उपविजेताले १५ लाख पाउने छ । यसपालि विदेशी खेलाडीहरुको पनि उल्लेख्य सहभागीता छ ।
