नेपालगन्ज । जिल्ला प्रहरी कार्यालय बाँकेले ६६औँ प्रहरी दिवस एक कार्यक्रमको आयोजना गरी मनाएको छ । कार्यालय परिसरमा आयोजित कार्यक्रम जिल्ला प्रहरी प्रमुख एसपी श्यामकृष्ण अधिकारीको सभापतित्व तथा प्रमुख जिल्ला अधिकारी शिवराम गेलालको प्रमुख आतिथ्यमा सम्पन्न भएको हो ।
सो अवसरमा पूर्व प्रहरी, अशक्त अवकाश प्राप्त प्रहरी, अमर प्रहरी परिवार तथा सञ्चारकर्मी, नागरिक समाज, जिल्ला सरकारी वकिल कार्यालयका प्रमुख, सशस्त्र प्रहरी बलका सशस्त्र प्रहरी उपरीक्षक अशोक बहादुर बम, नेपाली सेनाका प्रमुख सेनानी जनमत कार्की, राष्ट्रिय अनुसन्धान जिल्ला कार्यालय बाँकेका प्रमुख नरेन्द्र राज गिरी लगायतका अतिथिहरूको उपस्थिति रहेको थियो । कार्यक्रमको स्वागत मन्तव्य जिल्ला प्रहरी कार्यालय कार्यालयका प्रवक्ता डिएसपी मधुसूदन न्यौपानेले व्यक्त गरेका थिए ।
त्यस अवसरमा प्रहरी महानिरीक्षकबाट प्रहरी दिवसको अवसरमा प्राप्त शुभकामना सन्देश जिल्ला प्रहरी कार्यालय बाँकेका एसपी अधिकारीले वाचन गर्नुभएको थियो । कार्यक्रममा पूर्व प्रहरी कर्मचारीको तर्फबाट पूर्व प्रहरी नायव उपरीक्षक ज्योति प्रसाद श्रेष्ठ, अमर प्रहरी परिवारको तर्फबाट श्रीमती एकमाया विश्वकर्मा लगायतले शुभकामना मन्तव्य व्यक्त गर्नुभएको थियो । उक्त अवसरमा अमर प्रहरी स्मारकमा प्रमुख अतिथि गेलालले माल्यार्पण गरेका थिए ।
कार्यक्रममा उत्कृष्ट कार्य गर्ने जिल्ला प्रहरी कार्यालय तथा मातहत प्रहरी इकाईका प्रहरी कर्मचारी तथा प्रहरी कार्यमा सहयोग गर्ने र जग्गादाताहरूलाई प्रहरी प्रधान कार्यालयबाट प्राप्त कदर पत्र प्रदान गरिएको थियो । अमर प्रहरी परिवारजनलाई दोसल्ला ओढाई सम्मान समेत गरिएको थियो । दिवसका अवसरमा उत्कृष्ट काम गर्ने २६ जना प्रहरीलाई सम्मान गरिएको छ । । साथै ६६औँ प्रहरी दिवस २०७८ को अवसरमा ब्याडमिन्टन, टेबल टेनिस, कुर्सी दौड प्रतियोगिता सञ्चालन गरिएकोमा खेलकुदमा प्रथम, द्वितीय र तृतीय हुनेहरूलाई प्रमाणपत्र र मेडल प्रदान गरिएको थियो। त्यस अवसरमा जिल्ला प्रहरी कार्यालय बाँकेद्वारा तयार पारिएको पुस्तक 'लागू औषध विरुद्धको निस्तेज अभियान २०७७/०७८' को विमोचन समेत गरिएको थियो ।
कार्यक्रममा बोल्दै प्रमुख अतिथि प्रजिअ गेलालले नेपाल प्रहरीको गर्विलो इतिहास र सुनौलो भविष्य रहेको बताउँदै जनताको आशा र भरोसाको केन्द्रमा नेपाल प्रहरी रहेकोले त्यस आशा र भरोसालाई कायम राख्न नेपाल प्रहरी सफल हुने विश्वास व्यक्त गरे । कार्यक्रमको अन्त्यमा जिल्ला प्रहरी कार्यालय बाँकेका प्रमुख प्रहरी उपरीक्षक अधिकारीले धन्यवाद ज्ञापन गर्दै नेपाल प्रहरी वीर तथा अमर प्रहरीले देखाएको मार्गमा सधैँ अडिक भएर लाग्ने र जनअपेक्षा पूरा गर्नका लागि जस्तोसुकै कठोर निर्णय लिन पनि तयार रहेको बताएका थिए । प्रहरी निरीक्षक ईश्वरदेव गिरीले कार्यक्रम सञ्चालन गरेका थिए ।
