स्याङ्जाको वालिङमा जिप दुर्घटना : ३ को मृत्यु, १७ घाइते

श्रीकृष्ण सिग्देल,

प्रकाशित २०७८ असोज २५ सोमबार

स्याङ्जा । स्याङ्जाको वालिङमा हिजो (आइतबार) साँझ भएको जिप दुर्घटनामा ४ वर्षीय बालक सहित ३ जनाको मृत्यु भएको छ भने १७ जना घाइते भएका छन् ।

वालिङ बजारबाट गल्याङको पकवादीका लागि छुटेको ग १ ज ४९१८ नम्बरको जिप वालिङ १० मदिखोलामा दुर्घटना भएको हो ।

दुर्घटना परी गल्याङ ९ का ३२ वर्षीय गंगी पल्ली, सोही ठाउँका ७७ वर्षका दल बहादुर पल्लीको घटनास्थलमा नै ज्यान गएको थियो भने गल्याङ १० का ४ वर्षीय करिष्मा थापाको पोखरा स्थित मणिपाल अस्पतालमा उपचारको क्रममा निधन भएको जिल्ला प्रहरी कार्यालय स्याङ्जाले जनाएको छ ।

दुर्घटनामा चालक सहित १७ जना घाइते भएको प्रहरीले जनाएको छ । घाइते मध्ये १३ जनाको पोखरा स्थित मणिपाल अस्पतालमा उपचार भइरहेको छ भने अन्य ४ जना सामान्य उपचार पछि घर फर्केको प्रहरीले जनाएको छ ।

कच्ची सडक, रातको समय र क्षता भन्दा बढी यात्रु हुँदा जिप उकालोमा ब्रेक फेल भएर दुर्घटना भएको अनुमान प्रहरीले लगाएको छ ।

झन्डै एक सय मिटर तल झरेको जिपमा १९ जना यात्रु सवार रहेको बताइएको छ । चालकलाई नियन्त्रणमा लिएर थप अनुसन्धान भइरहेको प्रहरीले जनाएको छ ।