-
-
-
-
काठमाडौँ । बुधवार चीनबाट १० लाख डोज भेरोसेल खोप काठमाडौँ ल्याइएको छ । कोरोना भाइरस(कोभिड-१९) विरुद्धको १० लाख डोज खोप नेपाल आइपुगेको खोप शाखाका प्रमुख डा. सागर दाहालले हाम्रा कुरलाई जानकारी दिएका हुन् ।
सरकारले पछिल्लो पटक चीनबाट ५९ लाख डोज भेरोसेल खोप खरिद गर्ने सम्झौता गरेको छ । सोही अन्तर्गत 'पहिलो लटको खोप बुधवार बिहान आएको' डा. दाहालले बताए ।
बाँकी खोप पनि चाँडै भित्र्याउने तयारी रहेको डा. दाहालको भनाइ छ । यस्तै चीन सरकारले अनुदान स्वरूप दिने भनेको ३६ लाख डोज भेरोसेल खोपमध्ये १६ लाख डोज पनि १० दिनभित्र आउने भएको छ ।
चीन सरकारले १६ लाख र पछिल्लो पटक २० लाख डोज कोभिड१९विरुद्धको खोप नेपाललाई अनुदानमा दिने घोषणा गरेको थियो । सो अन्तर्गतको अघिल्लो चरणको १६ लाख डोज खोप हप्ता दस दिनभित्रमा आउने डा. दाहालले बताएका हुन् ।
