देउवाकै गृह जिल्लाका सभापतिसहितका नेताहरुले सानेपामा शुरु गरे अनसन

हाम्रा कुरा

प्रकाशित २०७८ मंसिर १ बुधबार

काठमाडौं। कांग्रेस सभापति शेरबहादुर देउवाकै गृह जिल्ला डडेलधुराका जिल्ला सभापति सानेपामा धर्नामा बसेका छन्।

डडेलधुरा कांग्रेसका सभापति कणर्बहादुर मल्लसहितको टोली अवैध रुपमा वडा र पालिका अधिवेशन गरिएको र क्रियाशिल सदस्यतामा मनोमानी गरिएको भन्दै बुधबारबाट कांग्रेस केन्द्रीय कार्यालय सानेपामा अनसनमा बसेको हो।

उनीहरुले डडेल्धुराको वडा र पालिका तहका अधिवेशन निष्पक्ष रुपमा पुनः गर्नुपर्ने माग राखेका छन्। यो समूहले यसअघि डडेलधुरामा गरिएको अधिवेशन बहिष्कार गरेको थियो।

उनीहरुले जिल्लाबाट सिफारिस गरि पठाइएका बाहेकका सदस्यता केन्द्रबाट थप गरी संख्या मनोमानी रुपमा बढाइएको भनेका छन्।

जिल्लाले पठाएका क्रियाशील सदस्यहरू ५८०४ मध्ये ४६० विना कारण हटाइएको र समायोजन भएका १०० सहित ४१२ एकपक्षीय रूपमा नयाँ थप गरिए पछि भाद्र २५ गते गरिएको एकलौटी वडा अधिवेशन प्रति असहमति राख्दै प्रक्रियाको प्रमाण सहित ९२ पानाको अवैधानिक अधिवेशन कागजातहरू जिल्ला कार्य समितिको बहुमत निणर्यबाट जिल्ला कार्य समितिले केन्द्रीय कार्य समितिलाई भाद्र ३१ नै बुझाएको थियो।

डडेलधुरा सभापति मल्लले ११ दिन जिल्ला पार्टी कार्यालयमा अनसन बस्दा पनि सुनुवाइ नभएकाले केन्द्रीय कार्यालयमा आएर धर्ना बसेको जानकारी दिए।

अनसनमा जिल्ला उपसभापति करुणाकर भट्ट, नेपाल विद्यार्थी संघका पूर्वअध्यक्ष केशव सिंह, महाधिवेशन प्रतिनिधि हरि भट्टसहितका नेताहरु सहभागी छन्।