कांग्रेस गण्डकीमा लमजुङका सहमहामन्त्रीसहित पाँच जना निर्वाचित

हाम्रा कुरा

प्रकाशित २०७८ मंसिर २० सोमबार

लमजुङ । नेपाली कांग्रेस गण्डकी प्रदेश कार्यसमिति पदाधिकारीमा सहमहामन्त्रीसहित पाँच पदमा लमजुङबाट निर्वाचित भएका छन् । लमजुङका रमेशकुमार पाण्डे ६१८ मत ल्याएर निर्वाचित भएका हुन् । सदस्यमा लमजुङका चार जना निर्वाचित भएका छन् । भुगोलतर्फ दुई जना, खुल्ला र खसआर्य महिलातर्फ एक–एक जना निर्वाचित भएका हुन् ।

कांग्रेसको विधान अनुसार एक महिलासहित अनिवार्य दुई जना सदस्य निर्वाचित हुने भुगोलतर्फ जिल्लाका महाधिवेशन प्रतिनिधि हरि बराल र छुपीमाया गुरुङ निर्वाचित भएका हुन् । निर्वाचन मतपरिणाम अनुसार जिल्लाबाट पुरुषतर्फ बराल र जिवनकुमार श्रेष्ठबीच चुनावी प्रतिष्पर्धा भएकोमा बरालले पाँच सय ५९ मत प्राप्त गरेका छन् भने श्रेष्ठले चार सय ६३ मत पाएका छन् ।

विधान अनुसार प्रदेश कार्यसमितिमा आठ जना रहने खुल्ला सदस्यतर्फ लमजुङका दिपेश गौतम निर्वाचित भएका छन् । प्रदेश कार्यसमितिका लागि खसआर्य महिलातर्फ उम्मेदारी दिएका लमजुङका विष्णुमाया धिताल र सुस्मिता थापा अधिकारीमध्ये धिताल निर्वाचित भएकी छिन् ।