सभापतिको अडान कायम राख्दै डा.शेखरको प्रचार: ‘एकपटक, यसै पटक’

हाम्रा कुरा

प्रकाशित २०७८ मंसिर २३ बिहिबार

काठमाडौं । नेपाली कांग्रेसको संस्थापनइतर पक्षबाट सभापतिको आकांक्षी डा.शेखर कोइरालाले प्रचारप्रसार शुरू गरेका छन् । इतर पक्षको साझा उम्मेदवार उठाउनुपर्ने दबाबका बीच शेखरले प्रचारप्रसार शुरू गरेका हुन् ।

आफू कुनै पनि हालतमा पछाडि नहट्ने बताउँदै आएका शेखरले अर्का आकांक्षी प्रकाशमान सिंहले दाबी छाडे आफूले पनि छाड्ने बताएका थिए । तर, सिंहले आफ्नो दाबी कायमै रहेको बताएपछि शेखरले पनि आफूले केन्द्रीय सभापतिको पदमा उम्मेदवार दिने बताएका छन् ।

पौडेल भने सिंह र शेखरबीच सहमति नबन्दा दुखी छन् । उनले बुधबार बसेको बैठकमा दिक्क मान्दै सहमति नबने राजनीतिबाटै बिदा हुन्छु भनेका थिए । यी तीनैजना नेताहरू बिहीबार बोलाइएको केन्द्रीय समिति बैठकमा गएनन् । साझा उम्मेदवार छान्ने कसरतसहित आपसमा छलफलमा रहेका उनीहरूबीच कुनै खाले सहमति हुन सकेको छैन ।