नौ सय मत गन्न बाँकी, देउवालाई बहुमत ल्याउन ५४२ मत आवश्यक

हाम्रा कुरा

प्रकाशित २०७८ मंसिर २८ मंगलबार

काठमाडौं । नेपाली कांग्रेसको १४ औं महाधिवेशन अन्तर्गत नयाँ सभापति चयनका लागि भएको मतदानको मतपरिणाम आउने क्रम जारी छ । सभापतिका लागि पाँच जना मैदानमा छन् । अहिलेसम्म प्राप्त मतगणनाको परिणाम अनुसार सभापतिमा शेरबहादुर देउवाले अग्रता बनाएका छन् ।
३७७९ मत गन्दा देउवाले १७९८ मत पाएका छन् । डा. शेखर कोइरालाले १४१३ मत पाएका छन् । प्रकाशमान सिंहले २८६ मत पाएका छन् । विमलेन्द्र निधीले २०१ मत पाएका छन् । कल्याण गुरुङ्गले १९ मत पाएका छन् ।

आज बिहान पौने ४ बजेदेखि मतगणना शुरु भएको हो । कूल ४ हजार ७ सय ४३ मतदातामध्ये ४ हजार ६ सय ७९ मत खसेको थियो ।

बागमती र प्रदेश २ बाट मतगणना थालिएको थियो । सुदूरपश्चिमको मत गन्न बाँकी नै छ ।

नौ सय मत गन्न बाँकी छँदा बहुमत ल्याउन देउवालाई ५४२ मत जरुरी हुनेछ ।

कुनै पनि उम्मेदवारले कूल खसेको मतको ५० प्रतिशत बढी मत नल्याएमा दोस्रो चरणमा मतदान हुनेछ । यो अवस्थामा पहिलो र दोस्रो स्थानमा रहने उम्मेदवारबीच प्रतिस्पर्धा हुनेछ ।

यदि दोस्रो चरणमा चुनाव पुगेका खण्डमा संस्थापन इतर पक्ष एक हुने बताइएको छ ।