निर्वाचन समितिको बैठक बस्दै, सम्भवतः आजै दोस्रो चरणको निर्वाचन

हाम्रा कुरा

प्रकाशित २०७८ मंसिर २८ मंगलबार

काठमाडौं । नेपाली कांग्रेसको १४ औं महाधिवेशन अन्तर्गत नयाँ सभापति चयनका लागि दोस्रो चरणको मतदान कतिबेला गर्ने बारेमा यकिन भएको छ । यसका लागि केन्द्रीय निर्वाचन समितिको बैठक बस्दैछ ।

उक्त समितिको बैठकले सम्भवतः आजै सभापतिको दोस्रो चरणको मतदान गर्ने बारेमा निर्णय गर्ने निर्वाचन समितिका सचिव जगन्नाथ श्रेष्ठले बताए ।

यसअघि मतदानको पहिलो चरणबाट कसैले पनि बहुमत ल्याउन असफल भएका छन् । शेरबहादुर देउवा बहुमत प्राप्त गर्न असफल भएका छन् । अब दोस्रो चरणबाटै टुङ्गो लाग्ने भएको छ ।

सभापतिमा दोस्रो चरणमा शीर्ष दुईमा रहेर मत परिणाम टुंगो लगाएका शेरबहादुर देउवा र डा शेखर कोइरालाबीच भिडन्त हुनेछ ।

शेरबहादुर देउवाले पहिलो चरणमा २२५८ मत पाए । डा शेखर कोइरालाले १७ सय २९, प्रकाशमान सिंहले ३७१, बिमलेन्द्र निधीले २४९ तथा कल्याण गुरुङले २० मत पाएको पार्टी कार्यालयका मुख्य सचिव कृष्णप्रसाद पौडेलले जानकारी दिए ।