भारतले पहिलो पटक हरायो सेन्चुरियनमा दक्षिण अफ्रिकालाई, थपियो यो रेकर्ड

हाम्रा कुरा

प्रकाशित २०७८ पुष १५ बिहिबार

काठमाडौं । दक्षिण अफ्रिकाविरुद्धको पहिलो टेष्ट क्रिकेटमा भारत विजयी भएको छ । आज अन्तिम दिन ३०५ रनको चुनौती पछ्याएको दक्षिण अफ्रिका १९१ रनमै समेटिएपछि भारतले ११३ रनको जित निकाल्न सफल भएको हो ।

भारतले सेन्चुरियनमा पहिलोपटक टेष्टमा जित निकालेको हो । योसँगै भारतले अष्ट्रेलियाको रेकर्डसँग बराबरी गरेको छ । भारतले अहिलेसम्म सबैभन्दा धेरै मैदानमा जित हासिल गर्ने कीर्तिमानको बराबरी गरेको हो । सेन्चुरियन भारतका लागि ५६ औं मैदान हो ।

सेन्चुरियनमा जित निकाल्ने कोहली एसियाका पहिलो कप्तान पनि बनेका छन् ।

जितसँगै भारतले ३ खेलको श्रृंखलामा १–० को अग्रता लिन सफल भएको छ । खेलमा दक्षिण अफ्रिकाका कप्तान डिन एल्गारले ७७ रन बनाए पनि टिमलाई जिताउन सकेनन् । दक्षिण अफ्रिका ६८ ओभरमै अलआउट भयो ।

भारतका लागि जसप्रित बुमराह र मोहम्मद शामीले ३–३ तथा मोहम्मद सिराज र रविचन्द्रन आश्विनले २–२ विकेट लिए ।

यसअघि पहिले ब्याटिङ गरेको भारतले पहिलो इनिङ्समा ३२७ रन बनायो । प्लेयर अफ द म्याच लोकेश राहुलले १२३ रन बनाए ।

मायांक अग्रवालले ६० रन जोड्दा अजिन्क्या रहानेले ४८ रन बनाए । कप्तान विराट कोहली भने ३५ रनमा रोकिए । लुंगी एनगिडीले ६ तथा कागिसो रबाडाले ३ विकेट लिए ।

जवाफमा दक्षिण अप्रिकाले १९७ रन बनायो । टेम्बा बभुमाले ५२ रन बनाएको इनिङ्समा शामीले ५ विकेट लिए । बुमराह र शार्दुल ठाकुरले २–२ विकेट लिए ।

दोस्रो इनिङ्समा भारत १७४ रनमा समेटियो । ऋषभ पन्तले सर्वाधिक ३४ रन बनाएको इनिङ्समा कोहली १८ रनमै रोकिए । रहानेले २० रन जोडे । रबाडा र मार्को जासेनले ४–४ तथा एनगिडीले २ विकेट झारे ।

दोस्रो टेष्ट जनवरी ३ देखि जोहानेसवर्गमा हुँदैछ । भारतले दक्षिण अफ्रिकामा तीन टेष्ट र तीन एक दिवसीय खेल्नेछ ।